Прэм'ер-міністар Ізраілю Бэньямін Нэтаньягу ўвечары 13 чэрвеня запісаў відэазварот да іранскага народу. Зварот адбыўся на першыя содні абвешчанай Ізраілем аперацыі супраць Ірану і пасля першых абстрэлаў у адказ з Тэгерану.
Бэньямін Нэтаньягу назваў іранцаў ганарлівым народам і заклікаў іх паўстаць супраць свайго ўрада і пачаць барацьбу за вольнасць. Ён удакладніў, што Ізраіль змагаецца не супраць іранскага народу, а супраць ураду.
,,«Ісламскі рэжым, што прыгнятае вас ужо амаль 50 гадоў, пагражае знішчыць нашую краіну, Дзяржаву Ізраіль. Мэта аперацыі Ізраілю – перадухіліць пагрозу, якую ўяўляюць для нас ядравая праграма і балістычныя ракеты ісламскага рэжыму», – адзначыў Нэтаньягу.
Прэм’ер заявіў, што Ізраіль у выніку ўдараў па Іране знішчыў значную частку яго арсеналу балістычных ракетаў і самы буйны абʼект ва ўзбагачэнні ўрану, а таксама зліквідаваў «най вышэйшых вайсковых камандзіраў, высокапастаўленых фізікаў-ядравікоў».
У сваю чаргу міністр абароны Ізраілю Ісраэль Кац заявіў 13 чэрвеня, што Іран «перасек чырвоныя лініі, калі адважыўся выпусціць ракеты па грамадзянскіх паселішчах у Ізраілі». Ён паабяцаў забяспечыць «тое, каб рэжым аяталаў заплаціў вельмі высокую цану за свае злачынныя дзеі».
Атакі працягваюцца, у Іране выцек радыяцыі
Выданне «Newsru.co.il» паведамляе са спасылкай на іранскіх блогераў і іранскія медыі, што ўночы 14 чэрвеня ізраільскія ВПС нанеслі ўдар па вайскова-прамысловым комплексе Парчын, прыкладна за 30 кіламетраў на поўдзень ад Тэгерану, які звязаны з вытворчасцю ракетаў і ядравымі даследаваннямі. Акрамя таго, ВПС Ізраілю нанеслі ўдары па абʼекце 216-й бранятанкавай брыгады сухапутных войскаў Ірану ў правінцыі Зэнджан. Паведамляецца пра атаку на вежу сувязі ў Караджы, на захад ад Тэгерану, а таксама пра новыя выбухі ў Ісфахане, дзе месцяцца вайсковыя і ядравыя абʼекты, ды ў раёнах Хакімія і Тэхранпарс, дзе размешчаныя прамысловыя і вайсковыя абʼекты.
Прадстаўнік Ірану ў ААН паведаміў, што ў выніку ўдараў Ізраілю па цэлях на іранскай тэрыторыі 13 чэрвеня былі забітыя не менш як 78 асобаў, звыш 320 пацярпелі. У Ізраілю вядома пра трох загінулых.
Між тым гендырэктар Міжнароднага агенцтва атамнай энергіі (МАГАТЭ) Рафаэль Гросі заявіў 13 чэрвеня, што на асноўным прадпрыемстве ўзбагачэння ўрану ў іранскім Натанзе пасля начных нападаў Ізраілю адбыўся выкід радыяцыі ў выглядзе альфа-часціц.
,,«Узровень радыяцыі за межамі абʼекту ў Натанзе застаўся нязменным. Тып радыеактыўнага забруджвання, што прысутнічае ўнутры абʼекту, у асноўным альфа-часціцы, можна кантраляваць з дапамогай адпаведных ахоўных захадаў», – сказаў ён.
У ноч на 13 чэрвеня Ізраіль нанёс серыю ўдараў па Іране. У Ізраілі атаку тлумачаць тым, што Іран наблізіўся да атрымання ядравай зброі. Корпус вартаўнікоў Ісламскай рэвалюцыі паведаміў пра смерць свайго лідара. Удары Ізраілю трапілі ў заводы ўзбагачэння ўрану, ракетныя базы, аб’екты ў Тэгеране, Ісфахане, Тэбрызе ды іншых гарадах. Інфармацыйнае агенцтва Ісламскай Рэспублікі прызнала смерць у выніку ізраільскай атакі кіраўніка Корпусу вартаўнікоў Ісламскай рэвалюцыі генерала Хусэйна Салямі, камандуючага ўзброенымі сіламі Ірану генерала Голям Алі Рашыда, яшчэ некалькіх вайскоўцаў і фізікаў-ядравікаў.
Іран пасля атакі запусціў больш як сотню дронаў у бок Ізраілю, але сілы абароны Ізраілю заявілі пра перахоп усіх іранскіх дронаў. Увечары Іран выпусціў па Ізраілю каля 150 балістычных ракетаў. Духоўны лідар Ірану Алі Хамэнэі ў звароце да нацыі заявіў, што «сіянісцкі рэжым не застанецца цэлым пасля наступстваў свайго злачынства».
Якуб Хруст belsat.eu
