«Белсат» публікуе штодзённую хроніку рэпрэсій, якія праходзяць у Беларусі.
24 кастрычніка ў Берасцейскім абласным судзе пачаўся суд над мужам і жонкай з Баранавічаў – Уладзіславам і Таццянай Кашчэевымі, якіх абвінавачваюць паводле ч. 1 і ч. 2 арт. 356 Крымінальнага кодэкса («Здрада дзяржаве»). Вядома, што Таццяна раней працавала на 558-м авіацыйным рамонтным заводзе тэхнікам па працы, Уладзіслаў быў вайскоўцам і раней працаваў на 61-й знішчальнай авіябазе ў Баранавічах (в/ч 54804). Сужэнцам пагражае да 20 гадоў пазбаўлення волі.
Мінінфармацыі абнавіла спіс «экстрэмісцкіх матэрыялаў», уключыўшы ў яго некаторыя тэлеграм-каналы і тэлеграм-боты ініцыятываў, што займаліся дапамогай затрыманым беларусам. Напрыклад, тэлеграм-чаты «Координация помощи в Жодино» і «АВТО 97%»; тэлеграм-канал «Списки Задержанных (РУВД+Суды+Жодино+Окрестина)», які летась прызналі «экстрэмісцкім фармаваннем», а таксама «Probono – контакт-центр помощи пострадавшим»; тэлеграм-боты «Spiski.net» і «Тут помогут (Беларусь)». Акрамя таго, у спіс дадаліся тэлеграм-каналы «Сначала женщины, потом женщины», «Коленька Лукашенко», «Потрясающая Русофобия», «225 ОШБ», «Новости Беларусь Минск»; YouTube-канал «ПанГУСь»; старонкі «Вконтакте» «Быць belarusam» і «Новости Беларусь»; старонка ў «Facebook» «Alaxandar Zalivayka»; старонкі ў «Instagram» «gus_prabelarust», «rozochka_97» і «newbelarusinlt»; старонкі ў Tiktok «mihan164» і «chinovniktiktok», старонка ў «Аднакласніках» «Горки. Жыве Беларусь».
Сёння стала вядома, што Міністэрства ўнутраных справаў абнавіла спіс «экстрэмісцкіх фармаванняў», унёсшы ў яго тэлеграм канал і тэлеграм-чат «Белыя крылы Барановичи», датычнай да якога называецца 29-гадовая Вольга Нікалаева. На сённяшні дзень у краіне налічваецца 243 «экстрэмісцкія фармаванні».
25 кастрычніка суд Маскоўскага раёна Менска разглядаў справу над Мікалаем Ражко. Мужчыну абвінавачваюць паводле ч. 1 арт. 342 Крымінальнага кодэкса («Актыўны ўдзел у дзеяннях, што груба парушаюць грамадскі парадак») за ўдзел у пратэстах у жніўні 2020 года.
Сёння стала вядома пра затрыманне футбольнага заўзятара за татуіроўку на ACAB. На відэа, знятым сілавікамі, мужчына кажа, што раней з’яўляўся чальцом групоўкі футбольных заўзятараў «Дынама Менск», меў судзімасць за кіраванне аўтамабілем у нецвярозым стане, за ўгон аўтамабіля і крадзеж. Таксама мужчына абяцае вывесці татуіроўку цягам месяца. Верагодна, яго затрымалі на 15 содняў.
Як мінімум пяцёра сілавікоў у поўнай амуніцыі затрымлівалі сёння жыхара Берасця за ўдзел у пратэстах 2020 года. На відэа мужчына кажа, што падчас пратэстаў ён перакрываў вуліцу з дапамогай лаўкі і разбіраў брукаванку, кідаў камяні ў супрацоўнікаў міліцыі. Мужчыну пагражаюць 293-м артыкулам Крымінальнага кодэксу («Масавыя беспарадкі»).
Праваабаронцы «Вясны» апублікавалі статыстыку крымінальнага пераследу з 21 па 25 кастрычніка. Так, цягам гэтага тыдня наймене 66 чалавек судзілі паводле крымінальных справаў за палітыку. З 54 працэсаў мінімум 11 праходзілі ў закрытым рэжыме.
Раман Шавель belsat.eu
