Трамп напісаў пра адбыты абмен палоннымі, але ўкраінскія і расейскія медыі пішуць, што ён яшчэ трывае.
Украіна і Расея распачалі 23 траўня найбуйнейшы з пачатку вайны абмен палоннымі: кожны бок перадае каля тысячы чалавек. Прэзідэнт Злучаных Штатаў Доналд Трамп напісаў у сваёй сацыяльнай сетцы Truth Social, што абмен ужо завяршыўся. Расейскія і ўкраінскія медыі пішуць са спасылкамі на ўласныя крыніцы, што абмен працягваецца, але сапраўды пачаўся. Афіцыйна Расея і Украіна на момант публікацыі гэтага не пацвярджалі.
Абмен праходзіць на мяжы Украіны і Беларусі, пішуць расейскія медыі. Яны заяўляюць, што расейскіх палонных трымалі ў калоніі ў Сумах, гэта пераважна байцы з курскага і харкаўскага кірункаў. Расейскія медыі заяўляюць, што Украіна аддае Расеі амаль усіх палонных, якіх мае, а Расея – толькі дзясятую частку, бо агулам мае каля 10 тысячаў. Ва Украіне казалі, што на пачатак траўня ў расейскім палоне было каля 8 тысячаў чалавек.
Абмен мае прайсці за некалькі этапаў і можа расцягнуцца на некалькі дзён, пісала раней расейскае «РБК» са спасылкаю на дэпутата Дзяржаўнай думы Расеі Шамсаіла Сараліева. Гэта тлумачылі вялікаю колькасцю асобаў, якіх хочуць абмяняць. У Крамлі запэўнівалі, што «ніхто не зацікаўлены зацягваць працэс».
На абмен палоннымі бакі дамовіліся 16 траўня падчас перамоваў у Стамбуле. 22 траўня Расея і Украіна абмяняліся спісамі імёнаў. Ці ёсць у спісах беларусы, невядома.
Абмены палоннымі між Расеяй і Украінай адбываліся не раз, але былі менш масавыя. З пачатку поўнамаштабнай вайны і да гэтага абмену ва Украіну з расейскага палону вярнулі 4552 вайскоўцы і цывільныя, але найбольшым быў абмен, у якім дамоў вярнуліся 277 асобаў. За ўвесь 2024 год Расея вярнула толькі 535 вайскоўцаў.
Алесь Наваборскі belsat.eu
