«Белсат» падводзіць вынікі апошніх содняў вайны
«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі на вечар 3 чэрвеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 30 950 чалавек забітымі. Цягам апошніх содняў на Данецкім і Луганскім напрамках украінскія сілы адбілі пяць атак расейцаў. Пры гэтым асноўныя баявыя дзеянні праводзіліся ў раёне Севераданецку. Дарадца Офісу прэзідэнта Украіны Аляксей Арэстовіч прызнаў, што выбіць расейцаў з гораду наўрад ці ўдасца, хаця праціўнік пры штурме нясе вялікія страты. Разам з тым кіраўнік Луганскай абласной адміністрацыі Сяргей Гайдай выказаў меркаванне, што шанцы на хуткае вызваленне ёсць. Ён прызнаў, што расейцы цяпер кантралююць большую частку гораду і каля 20 % Севераданецку можна лічыць «шэраю зонай». Але ўкраінскія вайскоўцы трымаюць пазіцыі ў адной з частак гораду і нават часам выбіваюць праціўніка з некаторых вуліцаў, беручы палонных. На іншых участках фронту расейцы не праводзілі актыўных наступальных аперацыяў, замест гэтага яны ўмацоўвалі свае пазіцыі ды праводзілі ратацыю асабовага складу. Разам з тым абстрэлы ўкраінскай тэрыторыі авіяцыяй і артылерыяй працягваліся па ўсёй лініі сутыкнення.
Пры гэтым прэсавы сакратар прэзідэнта Расеі Дзмітрый Пяскоў заявіў, што на працягу ста дзён так званай спецаперацыі ва Украіне Расея дабілася некаторых вынікаў у плане абароны грамадзянаў Данбасу, а таксама дапамагла людзям вярнуцца да мірнага ладу жыцця. Таксама прадстаўнік Крамля заявіў, што ад «пранацысцка настроеных сілаў УС Украіны і нацысцкіх сілаў» Расея вызваліла шмат якія паселішчы. Міністр культуры і інфармацыйнай палітыкі Украіны Аляксандр Ткачэнка паведаміў, што за 100 дзён вайны ва Украіне былі разбураныя 370 помнікаў культурнай спадчыны, прычым амаль палова з іх – цэрквы розных канфесіяў.
Спецыялісты, якія працуюць на Чарнобыльскай АЭС, падлічылі страты ад захопу станцыі расейскімі вайскоўцамі ў пачатку вайны ва Украіне. Усяго расейскія вайскоўцы вывезлі са станцыі або знішчылі 698 камп’ютараў, 344 транспартавыя сродкі, 1500 дазіметраў, а таксама важныя праграмы і амаль усё абсталяванне для гашэння пажараў. Меркаваны кошт замены страчанага – 135 мільёнаў долараў. У гэты ж час украінская выведка паведаміла, што на Запарожскай АЭС склалася крытычная сітуацыя з забеспячэннем стабільнай і бяспечнай працы станцыі праз адсутнасць запчастак і расходных матэрыялаў. Расейцы хочуць падлучыць станцыю да энергасістэмы РФ, але пакуль з тэхнічных прычынаў гэта немагчыма.
Аляксандр Лукашэнка 3 чэрвеня стэлефанаваўся з генеральным сакратаром ААН Антонью Гутэрышам і выставіў умову, пры якой пагодзіцца на транзіт украінскага збожжа праз Беларусь у балтыйскія парты. Паводле Лукашэнкі, гэтыя парты павінны быць адкрытыя і для беларускіх тавараў. У сваю чаргу Антонью Гутэрыш прапанаваў узяць паўзу на некалькі дзён, каб абмеркаваць гэтае пытанне з кіраўніцтвам зацікаўленых краінаў і вызначыць умовы паставак украінскага збожжа праз Беларусь. Тым часам Турцыя падрыхтавала дарожную мапу для разблакавання экспарту ўкраінскага збожжа. Дэталі абмяркуюць на сустрэчы з прадстаўнікамі Украіны, Расеі, Турцыі ды ААН бліжэйшымі днямі. Чакаецца, што ў выніку 20 мільёнаў тон збожжа і насення сланечніку з Украіны ды Расеі паставяць на сусветныя рынкі. Пры гэтым, паводле агенцтва «Reuters», Расея ўжо экспартавала ў Сірыю каля 100 тысяч тонаў пшаніцы, скрадзенай з Украіны за апошнія тры месяцы. Пры сусветных цэнах на пшаніцу вышэй за 400 долараў за тону такі аб’ём каштуе больш за 40 мільёнаў долараў.
Віцька Кавалак belsat.eu
