«Белсат» распавядае пра рэпрэсіі беларускага рэжыму супраць народу
Судовы канвеер, палітычныя рэпрэсіі і затрыманні нязгодных і пратэстоўцаў супраць нелегітымнай беларускай улады ў Беларусі не спыняюцца. «Белсат» распавядае пра рэпрэсіі беларускага рэжыму супраць свайго ж народу, здзейсненыя 10 чэрвеня.
– Супраць уладальніка былой інтэрнэт-крамы «Symbal.by» Паўла Белавуса распачалі крымінальную справу. Следчы камітэт, паводле матэрыялаў ГУБАЗіК, абвінавачвае Паўла Белавуса ў кіраванні экстрэмісцкім фармаваннем, паведамляе адзін з праўладных Telegram-каналаў.
Паўла Белавуса затрымалі 15 лістапада летась. Спачатку яму прысудзілі 15 содняў адміністратыўнага арышту, потым яшчэ 13 содняў. 16 снежня ён меўся выйсці на свабоду з ізалятару на Акрэсціна, але яго зноў перазатрымалі. Супраць яго распачалі крымінальную справу паводле арт. 342 КК за нібыта арганізацыю і падрыхтоўку дзеянняў, якія груба парушаюць грамадскі парадак, або актыўны ўдзел у іх. Цяпер, магчыма, распачалі яшчэ адну справу.
– 9 чэрвеня падчас судовага паседжання Мікалай Аўтуховіч паскардзіўся на здароўе. Вязень распавёў, што праз кепскія ўмовы ў камеры, дзе высокая вільготнасць і вельмі холадна, ён захварэў на прастуду. У судзе ў сувязі з гэтым абвясцілі перапынак да 13 чэрвеня.
– Суд у Менску пастанавіў спагнаць з блогера Эдуарда Пальчыса больш за 575 тыс. рублёў. Паводле пракуратуры сталіцы, блогер «учыніў злачынствы, у выніку якіх пацярпелі УП «Менсктурыст», КТУП «Менсктранс», ДВА «Гаррамаўтадар Менгарвыканкаму», АКУП «Спецкамунаўтатранс» і ВКУП «Менскзелянбуд». У судзе пракуроры даводзілі, што блогер сваймі дзеяннямі пашкодзіў маёмасць, нанёс страты прадпрыемствам у выглядзе недаатрыманых прыбыткаў ад спынення руху гарадскога транспарту.
– Генеральны пракурор Беларусі Алег Швед накіраваў у Вярхоўны Суд заяву аб спыненні дзейнасці Свабоднага прафсаюзу Беларускага, Свабоднага прафсаюзу металістаў, Беларускага незалежнага прафсаюзу гарнякоў, хімікаў, нафтаперапрацоўнікаў, энергетыкаў, транспартнікаў, будаўнікоў і іншых работнікаў, а таксама асацыяцыі прафсаюзаў «Беларускі кангрэс дэмакратычных прафсаюзаў» (БКДП).
– Аляксандр Лукашэнка працягнуў рыторыку, што трэба працягваць палітыку кантролю і «зачыстак» у Беларусі. Ён заявіў, што няўрадавыя арганізацыі нясуць вялікую небяспеку для краіны. Ён заявіў, быццам пад «моднай шыльдай» недзяржаўных арганізацыяў, створаных дзеля абароны сабакаў і катоў, «падкідвалі палітычна ангажаваных людзей».
– Справу палітзняволенага журналіста Дзяніса Івашына перадалі ў суд, пра гэта паведамляе Вольга Івашына.
– У Менску затрымалі 35-гадовага вядучага інжынера Аляксандра Лаўрыновіча. Сілавікі схапілі інжынера проста на працоўным месцы ў «Менскінжпраекты». Прычына і падставы затрымання Аляксандра пакуль не агучваюцца.
– У судзе Воршы прысудзіў палітвязням Дзмітрыю Матусевічу і Вячаславу Лютынскаму па два гады абмежавання волі з накіраваннем ва ўстанову адкрытага тыпу. Мужчын абвінавацілі ў тым, што яны спрабавалі спаліць сувенірны дзяржаўны сцяг. За гэта распачалі крымінальную справу паводле арт. 370 КК («Здзек над дзяржаўнымі сімваламі»).
– Жыхара Дзяржынску Паўла Макаранку асудзілі на 1,5 гады «хатняй хіміі» за каментары ў бок працаўніка Мінабароны Беларусі падпалкоўніка Бартынскага, а таксама камандзіра першага ўзвода аператыўнай роты АМАП АУС Гарадзенскага аблвыканкаму Аляксандра Мацкевіча.
Алена Аляксандрава, belsat.eu
