«Такі падыход паўтарае эксперыменты Расеі».
Іранскі напад на Ізраіль дэманструе, што Тэгеран вучыцца ў Расеі і хусітаў з мэтаю больш небяспечных і эфектыўных аперацыяў, адзначыў у адмысловай справаздачы амерыканскі Інстытут вывучэння вайны. Адначасовая атака беспілотнікамі і ракетамі мае заблытаць супрацьпаветраную абарону – гэтак жа дзейнічае Расея ва Украіне.
«Спалучэнне беспілотнікаў, а таксама крылатых і балістычных ракет мае заблытаць і разбурыць ізраільскую супрацьпаветраную абарону. Часткаю гэтай аперацыі сталі сінхронныя атакі з боку баевікоў у Ліване і Емене, якіх падтрымлівае Іран», – піша ў справаздачы амерыканскі ISW.
Атака, учыненая на Ізраіль у ноч на 14 красавіка, дэманструе, што Тэгеран вучыцца ў Расеі і хусітаў з мэтаю больш небяспечных і эфектыўных аперацыяў, цэль якіх – як габрэйская дзяржава, гэтак і ЗША, азначае Інстытут вывучэння вайны:
,,«Такі падыход паўтарае эксперыменты Расеі, падчас якіх яна чыніць камбінаваныя ўдары па Украіне балістычнымі і крылатымі ракетамі, а таксама іранскімі беспілотнікамі з мэтаю пераадолець амерыканскія і еўрапейскія сістэмы супрацьракетнай і супрацьпаветранай абароны».
Эксперты падкрэсліваюць, што выкарыстанне іранскіх дронаў «шматлікімі непрыяцелямі Злучаных Штатаў» і паглыбленне сувязяў паміж гэтымі краінамі «дапамогуць Ірану, Расеі, Паўночнай Карэі і Кітаю адпрацаваць ужыванне гэтых сістэм». Такім чынам, падсумоўваецца ў справаздачы, ЗША са сваімі партнёрамі і хаўруснікамі сутыкаюцца з усё больш узаемазвязанай групаю супернікаў, якія дапамагаюць адно аднаму і вучацца адно ў аднаго.
Як паведамлялася, Іран запусціў па Ізраілю больш за 300 беспілотнікаў-камікадзэ і ракетаў. Амаль усе яны былі збітыя.
Сцяпан Кубік belsat.eu
