Латушка і Коўшык змогуць быць дэлегатамі КР, але не спікерамі ці кіраўнікамі камісіяў.
Трэці склад Каардынацыйнай рады ўхваліў новы Статут 9 ліпеня. КР расказала пра пяць асноўных зменаў, але поўны тэкст Статуту апублікуюць пазней. Выбары спікера абяцаюць правесці неўзабаве, але даты не называюць.
Першае паседжанне Каардынацыйнай рады трэцяга склікання адбылося яшчэ 12 чэрвеня. Ужо там выявіліся вялікія супярэчнасці паміж фракцыямі, што засядалі ў КР і кіравалі ёю дасюль, і тымі, хто атрымаў перамогу на першых і пакуль адзіных выбарах. Месцамі дайшло нават да абвінавачанняў як у нежаданні аддаваць уладу, гэтак і ў памкненні яе ўзурпаваць.
Адным з найбольш спрэчных пунктаў было сумяшчэнне мандатаў у Аб’яднаным пераходным кабінеце і Каардынацыйнай радзе: ці можа «міністр» быць адначасова і «дэпутатам»? Павел Латушка, які займае пасаду намесніка кіраўніцы Кабінету і прадстаўніка ў справе транзіту ўлады, перад выбарамі ў КР даводзіў, што існуюць краіны, дзе дэпутаты ёсць міністрамі і нават прэм’ер-міністрам. Напрыклад, Польшча і Чэхія. Паводле вынікаў выбараў Латушка прайшоў у КР (ягоны спіс заняў першае месца), як і прадстаўніца АПК у справе нацыянальнага адраджэння Аліна Коўшык.
28 чэрвеня КР ухваліла змены ў Статут, што дазволілі дэлегатам КР мець таксама і пасады прадстаўніка ці намесніка ў АПК, але забаранілі сумяшчаць гэтыя пасады ў АПК з пасадамі спікера, кіраўніка сакратарыяту, кіраўніка камісіі ці сябра працоўнай групы для слуханняў АПК у КР.
Цяпер у Статут унеслі і іншыя змены:
• Спікера, віцэ-спікера і сакратара будуць выбіраць простай бальшынёй галасоў, дэлегатаў на іншыя пасады – праз рэйтынгавую сістэму, паводле якой раней выбіралі спікера, віцэ-спікера і сакратара.
• Функцыі Нарады фракцыяў абмежавалі: амаль усе пытанні, акрамя неназваных асобных, разглядаюцца агульным складам КР. Раней было наадварот: Нарада фракцыяў была калектыўным органам кіравання, які вырашаў любыя пытанні, што не адносіліся да адмысловай кампетэнцыі агульнага складу.
• Дэлегатам КР дазволілі мець памочнікаў.
• Апісалі магчымасць пераходу з адной фракцыі ў іншую. Раней у Статуце былі прапісаныя толькі ўтварэнне фракцыяў, далучэнне да фракцыяў і выхад з іх.
На момант публікацыі ў спісе дакументаў КР апублікаваны стары Статут. Калі менавіта з’явіцца новы, не паведамляецца. Таксама не паведамляецца, калі будуць праведзеныя выбары спікера КР.
Алесь Наваборскі belsat.eu
