Гэта адна шостая частка ўсіх працаўнікоў.
З санаторыю «Belorus», які кіруецца Беларуссю, у літоўскіх Друскеніках збіраюцца звольніць 51 работніка. Гэта адна шостая частка ўсіх працаўнікоў, паведамляе «Delfi».
Паводле звестак Фонду сацыяльнага страхавання, цяпер на прадпрыемстве працуюць 298 чалавек. Прадстаўніца Службы занятасці Мілда Янкаўскайце паведаміла, што звальненне работнікаў узгодненае з прафсаюзам працаўнікоў санаторыю:
,,«Згодна з паведамленнямі гэтага года, папярэджанне атрымаў 51 работнік. Ім уручаныя папярэджанні пра скасаванне працоўнай дамовы на ініцыятыву працадаўцы без віны работніка».
Чыноўніца адзначыла, што найбольш работнікаў, якія будуць звольненыя, працуюць у школе, у лячэбных і фінансавых падраздзяленнях. Сярод тых, хто атрымаў папярэджанне, найбольш прыбіральнікаў, санітараў, настаўнікаў, выхавальнікаў, кінезітэрапеўтаў.
У снежні 2020 года праз уведзеныя Еўразвязам санкцыі ў дачыненні Беларусі, а менавіта да Галоўнага гаспадарчага ўпраўлення Кіраўніцтва справамі прэзідэнта, банк «Swedbank» замарозіў рахункі санаторыю. Іх разблакавалі ў ліпені мінулага года. Пасля функцыі заснавальніка санаторыю перадалі Рэспубліканскаму цэнтру аздараўлення і санаторна-курортнага лячэння насельніцтва.
Алена Рувіна belsat.eu
