На думку палітолага, гэта «адразу некалькі крокаў наперад».
Палітолаг Яўген Магда, дырэктар украінскага Інстытуту сусветнай палітыкі, пракаментаваў «Белсату» прызначэнне былога амбасадара Украіны ў Менску Ігара Кізіма амбасадарам ў асаблівых даручэннях у справе Беларусі.
«Само па сабе прызначэнне не можа змяніць цалкам палітыку. Але тое, што Ігар Кізім змяніў свой статус былога амбасадара на статус амбасадара ў асаблівых даручэннях, на маю думку, – плюс. То бок, ён цяпер можа весці як дыялог з беларускай дэмакратычнай апазіцыяй, так і з афіцыйным Менскам», – сказаў палітолаг.
Яўген Магда нагадаў, што дыпламатычныя стасункі паміж Кіевам і Менскам не разарваныя, а існуюць і да сёння.
«Зразумела, што для Ігара Кізіма зараз будзе галоўным заданнем – камунікаваць з прадстаўнікамі беларускіх дэмакратычных сілаў, бо размаўляць на сённяшні дзень з Лукашэнкам, відавочна, няма пра што. У нас мала супольных тэмаў. Ягоныя ўсе тэмы больш з Пуціным», – сказаў палітолаг.
Паводле яго, гэтым прызначэннем украінскія ўлады фактычна прызналі наяўнасць трыкутніка: «Кіеў – Менск – беларускія дэмакратычныя сілы».
«І цяпер за палітыку ў дачыненні Беларусі будзе афіцыйна вызначаны чыноўнік. У гэтым выпадку – чалавек са значным досведам, які мае пэўную палітычную адказнасць», – падкрэсліў Магда.
На думку палітолага, гэта «адразу некалькі крокаў наперад». Аднак ён не чакае пакуль радыкальных зменаў. Магда адзначыў, што амбасадару Кізіму яшчэ трэба сабраць неабходныя звесткі і потым вызначыць свае магчымасці. Таксама палітолаг заклікаў быць рэалістамі і прызнаць застарэласць двухбаковых праблемаў.
,,«Нам трэба шукаць з іх эфектыўнае выйсце. І трэба казаць пра тое, як нам рухацца далей наперад», – сказаў ён.
Магда спадзяецца, што прызначэнне амбасадара спрычыніцца да паляпшэння стасункаў Украіны і беларускіх дэмакратычных сілаў.
Апроч таго, ён не выключыў у перспектыве разрывання дыпламатычных стасункаў з Беларуссю, у выпадку далейшага талеравання Лукашэнка расейскай акупацыйнай палітыкі ва Украіне. У прыватнасці, у выпадку адкрыцця кансулату Беларусі ў расейскім Растове-на-Доне, якому могуць падлягаць і акупаваныя тэрыторыі Украіны.
Ігар Кізім быў апошнім амбасадарам Украіны ў Беларусі. Ён быў прызначаны на пасаду ў 2017 годзе і вызвалены ад абавязкаў прэзідэнтам Украіны Уладзімірам Зяленскім 22 чэрвеня 2023-га. Гэта адбылося пасля сустрэчы Аляксандра Лукашэнкі з кіраўніком непрызнаванай ДНР Дзянісам Пушыліным. Да гэтага Кізім заставаўся ў Менску.
2 лютага 2024 года ён паведаміў пра сваё прызначэнне спецпрадстаўніком у справе Беларусі. У абавязкі амбасадара для асаблівых даручэннях у справе Беларусі будуць уваходзіць «пытанні, звязаныя з дэмакратычнымі сіламі Беларусі як часткаю беларускага грамадства, якая выступае супраць палітыкі цяперашняга кіраўніцтва Беларусі, асабліва ў тым, што датычыць падтрымання расейскай вайсковай агрэсіі супраць Украіны».
Якуб Хруст belsat.eu
