«Белсат» падводзіць вынікі 844-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 16 чэрвеня чытайце ў нашым аглядзе.
На поўначы Харкаўскага раёну працягваюцца баі на ўчастку фронту паміж населенымі пунктамі Ліпцы і Глыбокае. Расейскі ваенкор Сямён Пегаў гаворыць, што Збройныя сілы Украіны ўвесь час контратакуюць, імкнучыся цалкам перахапіць ініцыятыву, але пакуль не маюць істотных поспехаў.
У Чугуеўскім раёне баявыя дзеянні лакалізуюцца ў цэнтральнай частцы гораду Ваўчанск і ў ягоных ваколіцах.
Праўкраінскі тэлеграм-канал «Говорять Снайпер» піша, што расейцы беспаспяхова намагаюцца прабіцца да сваёй дыверсійна-выведнай групы, якая прынамсі з пачатку чэрвеня знаходзіцца ў атачэнні на тэрыторыі Агрэгатнага заводу.
У гэты ж час ЗСУ часам праводзяць удалыя штурмавыя дзеянні, у ходзе якіх адкідаюць праціўніка і вызваляюць асобныя пазіцыі ў горадзе.
Аналітыкі праекту Deepstate гавораць, што на поўначы ад Ваўчанску расейскі бок працягвае будаўніцтва абарончай лініі.
У Генеральным штабе Збройных сілаў Украіны паведамілі, што цягам апошніх содняў на купянскім і ліманскім кірунках Сілы абароны краіны адбілі шэраг атак праціўніка ў ваколіцах населеных пунктаў Бераставое, Макееўка і Неўскае. Баі на гэтых участках фронту працягваюцца.
Тым часам тэлеграм-канал «НгП раZVедка» сцвярджае, што войскі РФ прасунуліся на адлегласць да 500 метраў з усходу ад сяла Сынькоўка ў Купянскім раёне Харкаўскай вобласці. Пры гэтым адзначаецца, што расейцы ўжо замацаваліся на новых пазіцыях, у сваю чаргу ЗСУ адышлі на поўдзень да Петрапаўлаўкі.
Іншая прарасейская крыніца – «Рыбарь» – піша, што таксама УС РФ рухаюцца на захадзе ад сяла Крахмальнае.
Акрамя гэтага фіксуецца ўзнаўленне баёў на ўсходзе ад Торскага (на левым беразе ракі Жарабец у Данецкай вобласці).
На так званым сівэрскім выступе, паводле Генштабу ЗСУ, расейцы наступалі каля сёлаў Раздолаўка і Верхнякаменскае, але прасунуцца не здолелі.
Тэлеграм-канал «Офіцер» піша, што таксама расейцы ціснуць у ваколіцах Выемкі і на тэрыторыі Белагораўкі. І калі на першым участку ЗСУ ўпэўнена абараняюцца, то ў Белагораўцы сітуацыя застаецца складанай – у першую чаргу праз асаблівасці мясцовага рэльефу. На думку крыніцы, у выпадку поспеху УС РФ на тэрыторыі населенага пункту у небяспечным становішчы акажацца сам Сівэрск.
Іншы праўкраінскі тэлеграм-канал – «Бахмутський Балу» – паведамляе, што на паўднёвым захадзе ад гораду расейцы атакавалі на ўчастку паміж сёламі Фёдараўка і Васюкоўка, але панеслі істотныя страты ды адышлі.
На краматорскім кірунку працягваюцца баі ва ўсходняй частцы гораду Часаў Яр, а таксама на ягоных флангах – з поўначы і поўдня.
Прарасейскі тэлеграм-канал «Фронтовая птичка» сцвярджае, што цягам содняў штурмавыя групы войскаў РФ прасунуліся на адлегласць да аднаго кіламетра і захапілі некалькі апорных пунктаў украінцаў. Пры гэтым канкрэтныя месцы зменаў лініі сутыкнення не агучваюцца.
Валодаюць ініцыятывай Узброеныя сілы РФ і на пакроўскім кірунку, дзе яны наступаюць з захаду ад раней занятага гораду Аўдзееўка.
У Deepstate фіксуюць прасоўванні расейцаў каля сяла Сокал і ў Новааляксандраўцы.
«НгП раZVедка» піша, што таксама УС РФ падышлі да ўскрайкаў населенага пункту Навасёлаўка Першая і цяпер рыхтуюцца да штурму.
Сямён Пегаў гаворыць, што акрамя гэтага войскі РФ маюць тактычныя поспехі на ўскрайках Карлаўкі.
На курахаўскім кірунку баі лакалізуюцца на тэрыторыі гораду Краснагораўка, у сяле Георгіеўка і каля Канстанцінаўкі. Зменаў лініі сутыкнення не адзначаецца.
На так званым урэмаўскім выступе расейцы ціснуць з поўдня на сяло Ураджайнае, але пакуль Сілам абароны Украіны ўдаецца стрымліваць праціўніка.
У Міністэрстве абароны РФ заявілі, што ў Запарожскай вобласці іхныя вайскоўцы захапілі сяло Загорнае (на паўднёвым захадзе ад гораду Гуляйполе). Украінскі бок пакуль не каментуе гэтую інфармацыю.
Таксама ў Запарожскай вобласці расейцы наступаюць на выступе па фронце ў ваколіцах гораду Арэхаў, але поспеху не маюць.
У Херсонскай вобласці Узброеныя сілы РФ зноў безвынікова атакавалі на левым беразе Дняпра каля сяла Крынкі.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu