У Жодзінскай турме адбыўся выязны суд у справе палітвязня Сяргея Ціханоўскага. Вязня судзілі паводле крымінальнай справы за непадпарадкаванне адміністрацыі папраўчай установы, піша прэсавая служба Генпракуратуры.
Палітвязня Сяргея Ціханоўскага, якога раней асудзілі на 18 гадоў зняволення, у турме абвінавацілі ў злосным непадпарадкаванні патрабаванням адміністрацыі папраўчай установы. У Жодзінскай турме адбылося выязное судовае паседжанне, падчас якога так званыя суддзі і пракуроры абвесцілі, што «Ціханоўскі са жніўня па лістапад 2022 года неаднаразова дапускаў непадпарадкаванне законным патрабаванням адміністрацыі ўстановы, у тым ліку парушаў парадак адбывання пакарання, не рэагаваў на законныя патрабаванні супрацоўнікаў, грубіяніў ім, правакаваў сукамернікаў».
Сяргей Ціханоўскі не прызнаў сваёй віны.
Тым не менш суддзя прызначыў палітвязню пакаранне ў выглядзе пазбаўлення волі на тэрмін 1 год і 6 месяцаў. Па сукупнасці прысудаў Сяргею Ціханоўскаму вызначылі пакаранне ў выглядзе пазбаўлення волі на тэрмін 15 гадоў 9 месяцаў 5 дзён з адбываннем 2 гадоў 5 месяцаў 18 дзён у турме, а астатняга тэрміну – у папраўчай калоніі ва ўмовах строгага рэжыму.
Алена Аляксандрава belsat.eu