Прыгожын зарэгістраваў кампанію ў Асіповіцкім раёне. Статутны капітал – 200 рублёў
Яўгеній Прыгожын у Беларусі стаў кіраўніком нядаўна створанай кампаніі таварыства з абмежаванай адказнасцю «Канкорд Менеджмент і Кансалтынг». Такія звесткі змяшчаюцца ў Адзіным дзяржрэгістры юрыдычных асоб і ІП Мінюсту Беларусі, піша Reform.by.
Паводле выдання, ТАА «Канкорд Менеджмент і Кансалтынг» са статутным фондам у 200 рублёў было зарэгістраванае Магілёўскім аблвыканкамам 19 ліпеня і атрымала УНП 791314882. Яго адрас рэгістрацыі – Асіповіцкі раён, вёска Цэль, вул. Усходняя, д. 2 а. Менавіта ў гэтай вёсцы знаходзіцца палявы лагер, куды прыбылі баевікі ПВК Вагнэра з Расеі.
Асноўным відам дзейнасці новай кампаніі заяўлена «Кіраванне нерухомай маёмасцю».
100% уладальнік беларускай кампаніі – расейскае ТАА «Канкорд Менеджмент і Кансалтынг» (1037843002515), а «кіраўніком» пазначаны Яўгеній Прыгожын. Расейская кампанія дзейнічае з 2003 года.
Якуб Хруст belsat.eu
