Днём 21 лютага расейскія войскі абстралялі цэнтр Херсону, ёсць траплянне ў прыпынак грамадскага транспарту, дзе было шмат людзей. У выніку абстрэлу ёсць загінулыя і параненыя.
Аператыўнае камандаванне «Поўдзень» паведамляе аб «прылётах» на прыпынак грамадскага транспарту, а таксама ў краму і шматпавярховыя жылыя дамы. На гэты момант вядома пра 6 загінулых і 12 параненых.
«Проста падчас прамовы крывавага дыктатара Пуціна аб «Мы не ваюем з народам Украіны» рашысты расстрэльвалі мірны Херсон і Ачакаў з рэактыўных сістэмаў залпавага агню», – заявіла аператыўнае камандаванне «Поўдзень».
Паведамляецца, што па ўсім горадзе выпушчаныя прынамсі 20 залпаў з сістэмаў «Град», якія трапілі ў жылыя кварталы, аб’екты крытычнай інфраструктуры, дзіцячы садок, шпіталь, прыватныя гаражы і аўтамабілі. Таксама ёсць інфармацыя аб траплянні ракетаў у жылы дом у цэнтры гораду.
У горадзе Ачакаў расейскія вайскоўцы працягнулі абстрэл партовай інфраструктуры, адзін чалавек паранены.
Алена Рувіна belsat.eu