На гэтым тыдні латвійскі ўрад плануе прыняць рашэнне аб вылучэнні Міністэрству абароны 10 мільёнаў еўраў для ўмацавання мяжы з Беларуссю. Грошы збіраюцца выдаткаваць з рэзервовых фондаў бюджэту.
План умацавання мяжы з Беларуссю быў зацверджаны латвійскім урадам у сакавіку 2024 года. Ён з’яўляецца часткай стварэння Балтыйскай лініі абароны і ўключае ў сябе ўзвядзенне абарончых пазіцыяў для салдат і ўмацаваных абарончых пазіцыяў, перашкодаў, супрацьтанкавых равоў, складоў боезапасаў і мін на працягу ўсёй мяжы з Беларуссю і Расеяй.
Першы этап плана ўзмацнення мяжы з Беларуссю плануецца завершыць у кастрычніку 2024 года. Цягам найбліжэйшых пяці гадоў на ўмацаванне мяжы будзе выдаткавана 303 мільёна еўраў.
Пачнуцца работы з раскопкі існуючых дарог для стварэння супрацьтанкавых равоў. Пазней у іх будуць пераабсталяваныя і меліяратыўныя канавы ўздоўж мяжы.
Таксама плануецца ўсталяванне розных тыпаў перашкодаў: супрацьтанкавых равоў, умацаваных бетоннымі блокамі і канструкцыямі, уключна з так званымі зубамі дракона і супрацьтанкавымі мінамі.
Размяшчэнне перашкодаў будзе прыстасавана да мясцовасці з выкарыстаннем натуральных перашкодаў: балотаў, лясоў і іншых прыродных аб’ектаў.
У памежнай зоне будуць створаныя сховы выбухоўкі, мін і інжынерных матэрыялаў для хуткага ўмацавання абарончых пазіцыяў. Плануецца распрацоўка планаў па падрыхтоўцы найважнейшых транспартавых артэрыяў – аўтамабільных дарог і чыгункі, мастоў – для хуткага і эфектыўнага перасячэння мяжы з мэтаю затрымкі магчымага прасоўвання праціўніка.
Як паведамляецца, нягледзячы на тое, што план разлічаны на пяць гадоў, агульнае ўмацаванне абароназдольнасці Латвіі будзе адбывацца цягам працяглага часу.
Раман Шавель belsat.eu
