У Марыупалі памерла адна з цяжарных жанчын, якая падчас авіяўдару расейскіх войскаў была ў радзільным доме. Пра гэта паведаміла журналістка «Голоса Америки» Ася Доліна ў Facebook.
«Першая цяжарная дзяўчына з відэа/фотарэпартажаў з месца бамбавання дзіцячай больніцы № 3 у Марыупалі (радзільня), тая, якую выносілі на насілках, не выжыла. Яе ненароджанае дзіця таксама не выжыла», – паведаміла журналістка.
Паводле яе, гэтую інфармацыю пацвердзіў фатограф Яўген Малалетка, які ў той дзень рабіў фотарэпартаж з месца падзеяў.
Яшчэ адна з пацярпелых падчас абстрэлу больніцы парадзіх – Мар’яна Падгурская – нарадзіла дзяўчынку.
У Марыупалі 9 сакавіка расейскія войскі нанеслі авіяўдар па дзіцячай больніцы і радзільні. Корпус, дзе нядаўна лячыліся дзеці, быў цалкам разбураны. У выніку выбуху загінулі трое асобаў, уключна з маленькай дзяўчынкай, і 17 былі параненыя, сярод іх – цяжарныя жанчыны, дзеці і лекары.
Раней міністр замежных справаў РФ Сяргей Лаўроў пацвердзіў, што расейскія войскі свядома атакавалі радзільню ў Марыупалі. Але, паводле яго, тая «даўно захопленая батальёнам «Азоў» ды іншымі радыкаламі».
ПС belsat.eu
