«BYPOL» апублікаваў расследаванне, у якім сцвярджае, што за расколам у арганізацыі, а таксама за тымі, хто стварыў другое аб’яднанне былых сілавікоў «BELPOL», стаіць дзейны агент беларускага КДБ.
Імя чалавека, пра якога ідзе гаворка ў сюжэце «BYPOL», не раскрываецца. Паводле прадстаўніка арганізацыі Станіслава Лупаносава, з прычыны таго, што арганізацыя былых беларускіх сілавікоў не мае права займацца аператыўнаю працаю на тэрыторыі чужой дзяржавы, а таксама таму, што ўся інфармацыя была перададзеная польскім спецслужбам. Акрамя таго, прадстаўнікі «BYPOL» не хочуць самасуду з боку беларусаў.
Містар Х, як яго называюць аўтары расследавання, звярнуўся да Аляксандра Азарава 9 жніўня 2022 года, у дзень стварэння Аб’яднанага пераходнага кабінету, у якім Азараў заняў пасаду прадстаўніка ў справе аднаўлення правапарадку.
Містар Х распавёў, што ён былы высокапастаўлены супрацоўнік КДБ, які звольніўся адтуль, каб змагацца з рэжымам Лукашэнкі, і з’ехаў у Грузію. Ён паведаміў, што ёсць унікальным спецыялістам у галіне нацыянальнай бяспекі, аператыўна-вышуковай дзейнасці і да т. п. Мужчына хацеў далучыцца да «BYPOL» і прасіў дапамагчы яму з візай.
Містар Х пераконваў, што ў пераходным кабінеце няма спецыялістаў ягонага ўзроўню, што ён кінуў высокааплатную працу дзеля барацьбы. Паводле ягоных словаў, пасля звальнення з КДБ ён працаваў у кіраўніцтве прыватнага прадпрыемства, але гэта ў хадзе расследавання не пацвердзілася – не было ніякіх звестак пра ягонае звальненне з КДБ. У ФСАН і іншых базах не знайшлося інфармацыі, што ён працаваў у цывільных арганізацыях пасля імавернага звальнення з КДБ. Было выяўлена, што ў сярэдзіне 2000 гадоў мужчына некалькі разоў уладкоўваўся ў прыватныя фірмы, а потым звальняўся і лёгка вяртаўся на працу ў КДБ. Паводле «BYPOL», гэта падобна да працы пад прыкрыццем.
Нягледзячы на ўсе гэтыя пытанні, «BYPOL», аднак, дапамог Містару Х адкрыць візу і запрасіў у Варшаву.
«Перасцярогі, што ён дзейны агент, былі ад самага пачатку. Мы разумелі ўсе рызыкі такога кроку. Аднак нават мінімальныя шанцы атрымаць у каманду такога высокапастаўленага супрацоўніка з такім высокім узроўнем допуску былі вартыя такой рызыкі. Ад самага пачатку мы вырашылі вельмі абмежавана пасвячаць яго ў справы арганізацыі. Да звестак плану «Перамога» і планаваных мерапрыемстваў увогуле не дапускалі. Яму даручылі выключна медыйную працу», – распавёў Станіслаў Лупаносаў.
Містар Х пачаў працу ў арганізацыі былых сілавікоў. Праз некаторы час ён пачаў правакаваць канфлікты паміж супрацоўнікамі, падбухторваць іх супраць Азарава, таксама настойліва спрабаваў даведацца пра дэталі плану «Перамога», прасіў пазнаёміць яго з замежнымі амбасадарамі, каб папрасіць у іх грошай на ягоныя радыкальныя ініцыятывы ў Беларусі, патрабаваў кантактаў партызанаў унутры Беларусі, каб яны выконвалі ягоныя заданні. Выступаў за радыкальныя сілавыя метады барацьбы.
Супрацоўнікі «BYPOL» запрасілі найлепшага паліграфіста Усходняй Еўропы, каб яшчэ раз праверыць свайго новага калегу, аднак Містар Х паспрабаваў дыскрэдытаваць спецыяліста і адмовіўся.
Новаму працаўніку «BYPOL» было даручана правесці і напісаць расследаванне пра КДБ. Ён гэтага так і не зрабіў і не перадаў ніякай важнай сакрэтнай інфармацыі, настойваў на тым, што КДБ не мае дачынення да злачынстваў супраць беларускага народу, маўляў, гэтым займалася толькі невялікая частка яго супрацоўнікаў і толькі падчас выбараў.
«Ён патрабаваў пазнаёміць яго з украінскім партнёрамі, каб атрымаць у іх зброю і выбуховыя прылады, нібыта каб знішчыць Лукашэнку і найвышэйшае кіраўніцтва рэжыму. Навязліва цікавіўся тэхнічнымі рэсурсамі плану «Перамога», асабліва дронамі дальняга радыусу дзеяння, і настойваў на ўдарах па Беларусі з тэрыторыі Польшчы і Літвы, у прыватнасці падчас параду 3 ліпеня, каб узарваць трыбуну Лукашэнкі з усімі высокапастаўленымі асобамі», – распавядае Лупаносаў.
Гэтая ідэя вельмі насцеражыла сябраў «BYPOL».
«Калі б мы рэалізавалі ідэю Містара Х, мы б сталі ў адзін шэраг з тэрарыстамі, таму што ўдар па трыбуне прывёў бы да ахвяраў сярод мірных жыхароў, – кажа Станіслаў Лупаносаў. – Пасля такога ўдару Польшча б арыштавала і аддала б пад суд усіх удзельнікаў аперацыі. Беларускі рэжым у такім выпадку запатрабаваў бы выдачы ўсіх, хто звязаны з «BYPOL» і Кабінетам як тэрарыстаў. Хутчэй за ўсё, польскі бок пагадзіўся б, каб не быць уцягнутым у вайну. А далей беларускую дыяспару прызналі б пагрозай нацыянальнай бяспецы і запатрабавалі б пакінуць краіну».
«BYPOL» сцвярджае, што цяпер дакладна вядома, што чалавек, пра якога ідзе гаворка ў расследаванні, – рэальны кіраўнік арганізацыі «BELPOL» і стаіць у ценю за тымі, хто выступае публічна ад яе імя. Ён таксама мае доступ да ўсёй канфідэнцыйнай інфармацыі, якая паступае ў «BELPOL».
«Белсат» звярнуўся за каментаром у «BELPOL» адносна інфармацыі агучанай у расследаванні «BYPOL». Там адказалі, што каментаваць гэта не будуць.
Марыя Міхалевіч belsat.eu
