Заснавальнік ПВК Вагнэра Яўгеній Прыгожын заявіў, што праз недахоп боепрыпасаў групоўка 10 траўня пакідае свае пазіцыі ў Бахмуце Данецкай вобласці і перадае іх падраздзяленням Міністэрства абароны РФ. Астатніх наймітаў і боепрыпасы Група Вагнэра адправіць у тылавыя лагеры, заявіла прэс-служба Яўгенія Прыгожына.
У відэазвароце Яўгеній Прыгожын звярнуўся да вайсковага камандавання, прэзідэнта і народу Расеі.
«Я выводжу падраздзяленні ПВК Вагнэра з Бахмуту, бо пры адсутнасці боепрыпасаў яны асуджаныя на бессэнсоўную гібель», – заявіў Прыгожын.
Кіраўнік ПВК Вагнэра таксама заявіў, што да 9 траўня яны павінны былі ўзяць Бахмут, але, ведаючы пра гэта, з 1 траўня іх адрэзалі ад любых артылерыйскіх снарадаў. Паводле Прыгожына, дэфіцыт снарадаў у вагнэраўцаў складае 90 %, а ўсяго падчас побыту ў Бахмуце яны атрымлівалі толькі 30 % боепрыпасаў ад патрэбнай колькасці.
Раней кіраўнік Групы Вагнэра запісваў відэазварот да вайсковага кіраўніцтва Расеі на фоне трупаў сваіх наймітаў. У відэа ён матам крычаў на кіраўніцтва Міністэрства абароны РФ за недахоп боепрыпасаў.
Прыгожын і раней крытыкаваў расейскае вайсковае кіраўніцтва за недахоп боепрыпасаў. Гэтак, у канцы красавіка падчас інтэрв’ю расейскаму ваенкару і прапагандысту Сямёну Пегаву ён заявіў, што ПВК Вагнэра праз нейкі час можа перастаць існаваць праз дэфіцыт снарадаў на вайне з Украінай. А днямі Прыгожын заявіў, што ўкраінскі контрнаступ ужо пачаўся.
Алена Рувіна belsat.eu