Заснавальнік ПВК Вагнэра Яўгеній Прыгожын запісаў відэазварот, у якім ён у нецэнзурнай форме крытыкуе найвышэйшае кіраўніцтва Міністэрства абароны Расеі за нястачу боепрыпасаў. На пачатку відэа дэманструюць трупы вагнэраўцаў.
Відэа са зваротам знятае на фоне некалькіх дзясяткаў трупаў наймітаў ПВК Вагнэра. Прыгожын сцвярджае, што гэта баявыя страты за адзін дзень 4 траўня: «Гэта хлопцы ПВК Вагнэра, якія загінулі сёння. Яшчэ кроў свежая».
Кіраўнік ПВК Вагнэра, звяртаючыся да міністра абароны РФ Сяргея Шайгу і начальніка Генштабу РФ Валерыя Герасімава, крычыць на іх матам за недахоп боепрыпасаў:
«Гэта нечыя бацькі і нечыя сыны. І тыя паскуды, якія не даюць боепрыпасаў, с*ка, будуць у пекле жэрці іх трыбухі. У нас недахоп боепрыпасаў 70 %. Шайгу, Герасімаў, дзе, с*ка, боепрыпасы? Паглядзіце на іх, с*ка!»
Далей Прыгожын кажа, што чыноўнікі сядзяць у дарагіх клубах, а іхныя дзеці «пруцца ад жыцця» і здымаюць ролікі на Youtube.
«Вы думаеце аб тым, што вы – гаспадары гэтага жыцця, і аб тым, што вы маеце права распараджацца іхнымі жыццямі. Думаеце аб тым, што калі ў вас ёсць склады ад снарадаў, то вы маеце на гэта права. Ёсць элементарныя падлікі – калі вы даяце норму боепрыпасаў, загінулых у пяць разоў менш. Яны прыйшлі сюды добраахвотнікамі і паміраюць за тое, каб вы жыравалі ў сваіх кабінетах з чырвоным дрэвам. Улічыце гэта», – кажа Прыгожын.
Гэта не першы выпадак, калі Прыгожын крытыкуе расейскае вайсковае кіраўніцтва за недахоп боепрыпасаў. Гэтак, у канцы красавіка падчас інтэрв’ю расейскаму ваенкару і прапагандысту Сямёну Пегаву ён заявіў, што ПВК Вагнэра праз нейкі час можа перастаць існаваць праз дэфіцыт снарадаў на вайне з Украінай. А днямі Прыгожын заявіў, што ўкраінскі контрнаступ ужо пачаўся.
Алена Рувіна belsat.eu
