«Белсат» працягвае весці хроніку палітычнага пераследу, які не сканчаецца ў Беларусі ўжо шмат гадоў.
Стала вядома, што беларускія спецслужбы арыштавалі дом у Пінску, дзе жыла сям’я журналіста Аляксея Дзікавіцкага – былога кіраўніка тэлеканалу «Белсат» і цяперашняга кіраўніка праекту Belarus Tomorrow. Як распавёў сам Дзікавіцкі, у гэтым доме ён правёў юнацтва, слухаў метал разам з сябрамі, выяўляў першыя фота і атрымаў у падарунак свой першы бел-чырвона-белы сцяг, які пашыла маці яшчэ ў 1990-м годзе.
«Я дагэтуль не ведаю, у чым мяне абвінавачваюць і чаму хочуць адабраць старыя, амаль стогадовыя дамы, што не маюць значнай матэрыяльнай вартасці», – каментуе журналіст і дадае, што спадзяецца на вяртанне маёмасці ў будучай прававой Беларусі, дзе вінаватыя будуць прыцягнутыя да адказнасці.
Раней была апячатана хата дзеда Дзікавіцкага ў вёсцы, дзе ён вырас да школы.
У Віцебску за «экстрэмізм» арыштавалі мясцовага прарасейскага актывіста Сяргея Лашкова. Ён быў вядомы тым, што адкрыта прасоўваў пракрамлёўскія ідэі сярод жыхароў. Пасля затрымання ён выдаліў частку сваіх сацсетак. Суд Чыгуначнага раёну вынес яму 10 сутак арышту – за лайк або рэпост «экстрэмісцкіх матэрыялаў».
Праваабарончая арганізацыя Amnesty International Polska пачала збор подпісаў у падтрымку беларускай праваабаронцы Насты Лойкі. Іх мяркуюць перадаць міністру замежных справаў Польшчы, каб справа Насты гучала на міжнароднай арэне.
Нагадаем, у чэрвені 2023 года Менскі гарадскі суд прызначыў Лойцы 7 гадоў калоніі за даклад пра пераслед анархістаў і левых актывістаў у Беларусі. Суд праходзіў у закрытым рэжыме і пазіцыя палітзняволенай застаецца невядомай.
Стала вядома дата суда над праваабаронцам, заснавальнікам фонду BYSOL Андрэем Стрыжаком – 18 красавіка ў межах спецвытворчасці разгляд ягонай справы адбудзецца ў Гомельскім абласным судзе. Нагадаем, яго абвінавачваюць па 15 артыкулах Крымінальнага кодэксу Беларусі.
Праваабаронцы прызналі яшчэ 11 чалавек палітычнымі зняволенымі. Іх імёны: Андрэй Шабуня, Мікалай Сідараў, Вераніка Жалубоўская, Алег Шылаў, Раман Емяльянаў, Алег Самародскі, Ірына Стасенка, Ягор Барыскевіч, Павел Мінчык і Дзмітрый Сідарэнка.
Надзея Вольная / belsat.eu
