КДБ арыштаваў дом былога дырэктара «Белсату» Аляксея Дзікавіцкага ў Пінску: «Хаты ў вёсцы, якую збудаваў мой дзед, у якой я гадаваўся да школы, ім мала».
Пра арышт дому ў Пінску Аляксей Дзікавіцкі паведаміў у сваім акаўнце ў Facebook.
,,«Даведаўся сёння, што арыштавалі яшчэ і дом у Пінску, які перадаў мне ў спадчыну бацька. Так, той самы на рагу вуліцаў Гогаля і Пралетарскай, у якім жыла ўся нашая вялікая сям’я, дзе мы з сябрамі праяўлялі свае аматарскія фотаздымкі і слухалі мэтал, дзе ў 1990-м мама пашыла першы ў маім жыцці бел-чырвона-белы сцяг, адкуль я 35 гадоў таму паехаў у інстытут, а яшчэ праз восем пайшоў «выкупляць нявесту» – будучую маю жонку. Той, у якім памерла мая бабуля», – напісаў Аляксей Дзікавіцкі.
Аляксей адзначыў, што дасюль не ведае, якія яму выстаўленыя абвінавачанні і «за што маюць намер пазбавіць тых старых стогадовых дамоў, якія маюць вельмі нязначную матэрыяльную вартасць».
Дзікавіцкі верыць, што ў новай Беларусі ўсім, у каго незаконна адабралі маёмасць, яе абавязкова вернуць, а вінаватыя адкажуць згодна з законам: «І не таму, што я асабіста прагну помсты, не, а таму, што іначай той новай Беларусі, прававой дзяржавы мы ніколі не пабудуем».
Нагадаем, што ў кастрычніку 2024 года Аляксей Дзікавіцкі атрымаў ліст са Следчага камітэту Беларусі, у якім паведамлялі, што на ягоны дом, які застаўся на радзіме, наклалі арышт пастановаю следчага. Інфармацыя пра гэта таксама была ўнесеная ў рэестр нерухомай маёмасці і зямельны кадастр Рэспублікі Беларусь. На практыцы гэта значыць, што, пакуль дом пад арыштам, з ім нельга нічога зрабіць: прадаць, падарыць, абмяняць ды іншае.
Раман Шавель belsat.eu
