Следчы камітэт распачаў спецыяльнае вядзенне супраць кіраўніка «BySol» Андрэя Стрыжака і главы фонда «By_Help» Аляксея Лявончыка. Адпаведная інфармацыя з’явілася ў Telegram-канале СК. Таксама вядома, што спецвытворчасць распачатая ў дачыненні яшчэ пяці актывістаў.
Паводле інфармацыі СК, на двух Андрэю Стрыжаку і Аляксею Лявончыку інкрымінуецца:
- ч. 1, ч. 2 і ч. 3 арт. 361-1 («Стварэнне экстрэмісцкага фарміравання»);
- ч. 2 арт. 361-2 («Фінансаванне экстрэміцкай дзейнасці»);
- ч. 2 і ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак, альбо актыўны ўдзел у іх»);
- ч. 3 арт. 361 («Заклікі да захадаў абмежавальнага характару (санкцыяў), іншых дзеянняў, скіраваных на прычыненне шкоды нацыянальнай бяспецы Рэспублікі Беларусь»);
- арт. 369 («Абраза прадстаўніка ўлады»);
- ч. 3 арт. 130 («Распальванне расавай, нацыянальнай, рэлігійнай альбо іншай сацыяльнай варожасці або рознасці»);
- ч. 2 арт. 367 («Паклёп у дачыненні Лукашэнкі»);
- арт. 369-1 («Дыскрэдытацыя Рэспублікі Беларусь»);
- ч. 2 арт. 368 («Абраза Лукашэнкі»);
- ч. 2 арт. 361-4 («Спрыянне экстрэмісцкай дзейнасці»);
- арт. 370 («Здзек з дзяржаўных сімвалаў»);
- ч. 2 арт. 361-3 («Вербаванне, навучанне, іншае рыхтаванне альбо выкарыстанне грамадзянаў для ўдзелу на тэрыторыі замежнай дзяржавы ва ўзброеным фармаванні, канфлікце»);
- ч. 5 арт. 16 і ч. 1 арт. 356 («Падбухторванне да здрады дзяржаве»);
- ч. 2 арт. 290-1 («Пагроза здзяйсненнем акту тэрарызму»);
- ч. 1 арт. 289-1 («Прапаганда тэрору»).
«Ну, нарэшце! Сядзім з Аляксеем Лявончыкам і лічым, у каго больш артыкулаў і тэрмін атрымаецца. Прыемны падарунак на дзень св. Мікалая. Працуем далей. Віншаванні прымаю ў выглядзе данату на збор дзецям палітвязняў!» – зрабіў на сваёй старонцы ў Facebook з гэтай нагоды допіс Андрэй Стрыжак.
Вядома таксама, што адначасова СК абвясціў пра пачатак спецвядзення і ў дачыненні іншых актывістаў: Яраслава Ліхачэўскага, Аляксея Кузьмянкова, Аляксандра Лапка, Аляксандры Жук і Аляксандра Падгорнага. Ім выставілі практычна такі ж пералік артыкулаў.
Іх таксама, як Лявончыка са Стрыжаком, запрашаюцьз'явіцца ва ўпраўленне СК у Гомлі.
Нагадаем: механізм спецвядзення ўжываюць у дачыненні абвінавачванага, які за межамі Беларусі і ўхіляецца ад яўкі ў орган, які вядзе крымінальны працэс. Магчымы ў 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фармавання альбо ўдзел у ім, масавыя закалоты, заклікі да санкцыяў ды інш.
Таксама глядзіце ў сюжэце:
Надзея Вольная belsat.eu
