Доналд Трамп паабяцаў увесці мыта на тавары з усіх краінаў свету. А тым часам еўрапейцы і канадцы адмаўляюцца ад амерыканскіх тавараў на знак пратэсту супраць палітыкі Трампа і замаўляюць каву «канадыяна» замест амерыкана.
Прэзідэнт ЗША Доналд Трамп заявіў, што новы тарыфны план, які будзе прэзентаваны на гэтым тыдні, закране ўсе краіны, а не толькі тыя, з якімі ў ЗША найбольшы гандлёвы дысбаланс. Паводле Трампа, мэта гэтага кроку – абарона амерыканскай эканомікі ад несумленнай глабальнай канкурэнцыі, паведамляе «Reuters».
Нагадаем, што 4 сакавіка ўступілі ў сілу новыя мыты 25 %, уведзеныя прэзідэнтам ЗША Доналдам Трампам на імпарт з Мексікі і Канады, а таксама адбылося падваенне мытаў на кітайскія тавары да 20 %.
У той жа час у Еўропе і Канадзе расце жаданне байкатаваць амерыканскія тавары. Паводле апытання «YouGov», апублікаванага 4 сакавіка, у Еўропе не засталося ніводнай краіны, дзе больш за палову насельніцтва станоўча ставілася б да ЗША, паведамляе «Bild».
Адмоўнае стаўленне да Амерыкі выліваецца ў заклікі да байкоту амерыканскіх тавараў, што ўжо адбіваецца на продажах. Напрыклад, у Нямеччыне продажы «Tesla» знізіліся на 76 % у параўнанні з пачаткам мінулага года.
Асабліва моцна негатыўныя настроі адчуваюцца ў Даніі, дзе абурэнне выклікалі намеры Доналда Трампа далучыць Грэнландыю да ЗША. У дацкай групе ў Facebook «Boykot varer fra USA», якая аб'ядноўвае 92 тысячы чалавек, актыўна абмяркоўваюць, якія тавары варта ігнараваць і чым іх можна замяніць. Падобныя супольнасці з’явіліся і ў Францыі («Le Boycott») ды Швецыі («Bojkotta varor från USA»), дзе колькасць удзельнікаў перавышае 80 тысяч.
Байкот закранае не толькі фізічныя тавары, але і лічбавыя паслугі: актывісты масава адмаўляюцца ад падпіскі на «Netflix», «Disney+» і «Amazon Prime Video». У Даніі сетка супермаркетаў «Salling» нават пачала маркераваць еўрапейскія тавары, каб заахвоціць спажыўцоў падтрымліваць мясцовы рынак.
Антыамерыканскія настроі заўважныя і ў Канадзе. Найбуйнейшая сетка супермаркетаў «Loblaw» пазначае тавары з ЗША літарай T (ад «tariff», анг. «(мытны) тарыф»), каб пакупнікі ведалі, што яны абкладаюцца дадатковымі мытамі і каштуюць даражэй. Акрамя таго, у шмат якіх кавярнях замест кавы амерыкана цяпер падаюць «канадыяна» як сімвалічны акт нязгоды.
Паводле апытання «Verian» для шведскага дзяржаўнага тэлеканалу SVT, каля 70 % шведаў ужо адмовіліся або разглядаюць магчымасць адмовіцца ад амерыканскіх тавараў. Цалкам байкоту не менш за месяц прытрымліваўся кожны дзясяты, а 19 % спажыўцоў перасталі купляць толькі пэўныя амерыканскія брэнды.
Асабліва моцны ўдар ад такіх зменаў адчувае «Tesla»: шматлікія спажыўцы адварочваюцца ад кампаніі праз палітычную актыўнасць Ілана Маска. У цэлым у Еўропе продажы «Tesla» ў студзені знізіліся на 45 %, а ў лютым – на 40 %. У Нямеччыне сітуацыя яшчэ больш драматычная: у лютым продажы кампаніі абрынуліся на 76 %.
У суботу, 29 сакавіка, па ўсёй Еўропе – ад Лондану да Берліну – адбыліся масавыя акцыі супраць «Tesla», да якіх далучыліся тысячы пратэстоўцаў.
Раман Шавель belsat.eu
