Камітэт дзяржаўнай бяспекі Беларусі заявіў пра затрыманне супрацоўніка беларускай мытні, які, як заяўляецца, быў агентам замежных спецслужбаў. Пра гэта апавялі ў фільме на тэлеканале ОНТ.
У эфіры заяўляецца, што затрымалі Дзмітрыя Скубілава, супрацоўніка Ашмянскай мытні, які меў від на жыхарства ў Літве. Там у яго жыла сям'я – жонка і двое малых дзяцей.
Паводле фільму, у адну з паездак да сям’і ў Літву, на ўездзе ў Вільню, Скубілава спыніла паліцыя. У паліцэйскай машыне быў працаўнік Дэпартаменту дзяржаўнай бяспекі Літвы ў цывільным. Мытніка адвезлі ў будынак ДДБ у Вільні, дзе сказалі, што ён павінен дапамагчы літоўскаму боку.
Паводле Скубілава, да супрацы яго змусілі пагрозамі, у тым ліку дэпартацыі. Як заяўляецца, мытнік перадаў спецслужбам звесткі на сотні асобаў, а таксама пра мытныя пункты пропуску і працу БелАЭС, якую Літва лічыць пагрозаю сваёй бяспецы.
Беларускі бок вінаваціць мытніка ў тым, што той збіраў інфармацыю пра былых і дзейных супрацоўнікаў КДБ, Міністэрства абароны, Дзяржаўнага памежнага камітэту ды іншых. Яго асудзілі на 9 гадоў пазбаўлення волі са штрафам 500 базавых велічыняў.
Якуб Хруст belsat.eu
