У Літве працягваюць шукаць вайскоўцаў ЗША, якія зніклі падчас вучэнняў на палігоне Падброддзе за 15 кіламетраў ад мяжы з Беларуссю. Афіцыйна экіпаж бранявой машыны выконваў тэхнічнае заданне – эвакуацыю іншага транспартавага сродку.
На палігоне Падброддзе – шмат спецыяльнай тэхнікі. Цяпер удзельнікі ратаўнічай аперацыі на месцы інцыдэнту спрабуюць дастаць з балота бранявую рамонтна-эвакуацыйную машыну эМ-88, якая знікла разам з жаўнерамі ЗША.
Аўшрус Буйкус, камандуючы ратаўнічай аперацыяй, лейтэнант:
- Паводле папярэдніх звестак, эвакуацыйная машына цяпер на глыбіні ад трох да пяці метраў. Яе стан застаецца незразумелым, як і дакладнае становішча і нахіл.
Пра знікненне вайскоўцаў 1-й бранятанкавай брыгады 3-й пяхотнай дывізіі Арміі ЗША сталася вядома ўвечары 25 сакавіка. Амаль праз содні літоўскія медыі паведамілі, што амерыканскія вайскоўцы загінулі. У той жа дзень пра гэта заявіў і генеральны сакратар НАТО Марк Рутэ падчас свайго візіту ў Варшаву.
Марк Рутэ, генеральны сакратар NATO:
- Гэта яшчэ раннія навіны, таму мы ня ведаем падрабязнасцяў. Але, відавочна, гэта сапраўды жахлівая навіна, і нашыя думкі – з сем‘ямі і блізкімі.
Пазней словы Марка Рутэ зняпраўдзілі ў прэс-службе НАТО. У Міністэрстве абароны Літвы таксама заявілі, што пакуль няма інфармацыі, якая пацвярджала б чалавечныя ахвяры.
Довіле Шакаліене, міністарка абароны Літвы:
- На сёння ўсе версіі правяраюцца. Амерыканцы паведамілі, што ўсю ноч працягвалі пошукі ў ваколіцах, бо ўсе сцэнары па-ранейшаму лічацца магчымымі, пакуль аўтамабіль не будзе бачны.
Міністарка абароны Літвы звярнула ўвагу, што ратавальная аперацыя праходзіць у вельмі складанай мясцовасці – балота, злучанае з возерам. Таму для пад‘езду цяжкой тэхнікі фактычна прыйшлося будаваць новую дарогу. Цяпер асноўная задача – спыніць паступленне вады ў месца інцыдэнту. Інакш, магчыма, давядзецца ставіць палі проста ў возера.
Раймундас Вайкшнорас, камандуючы Узброенымі сіламі Літвы:
- Што тычыцца працягласці аперацыі, то гэта, напэўна, будзе залежаць ад таго, як нам удасца асушыць пэўныя ўчасткі. І, вядома, гэта будзе залежаць ад умоваў надвор‘я.
Галоўнае пытанне – ці ёсць імавернасць, што вайскоўцы ЗША выжывуць, калі знаходзяцца ўнутры бранявой машыны? Прагнозы вайсковых экспертаў на гэты конт не аптымістычныя.
- Адзін чалавек за хвіліну выкарыстоўвае 6-8 літраў кіслароду. Калі мець на ўвазе, што месца ўнутры няшмат, а бронемашына – не падводны човен, то імавернасць невялікая. Аднак у любым вЫпадку варта верыць у цуды, - Дарус Антанайціс, эксперт у вайсковай справе, маёр запасу Літоўскай арміі ў інтэрв‘ю выданню «Delfi».
1-ая бранятанкавая брыгада 3-й пяхотнай дывізіі Арміі ЗША была адным з першых падраздзяленняў, разгорнутых у Еўропе пасля поўнамаштабнай агрэсіі Расеі супраць Украіны ў 2022-м. Жаўнеры вярнуліся на кантынент сёлета на пачатку года, каб пачаць чарговую дзевяцімесячную ратацыю. Агулам ЗША захоўваюць сваю прысутнасць, у тым ліку ў Балтыйскім рэгіёне, з 2014 года ў межах аперацыі «Атлантычная рашучасць», распачатай пасля акупацыі Расеяй Крыму.
<iframe width="560" height="315" src="https://www.youtube.com/embed/qTQM3JSYYKc?si=H__uLrsmcZR7vMdH" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>
Ірына Юр’ева belsat.eu
