Кампанія, якую стварыў судзімы за махлярства прадпрымальнік і якая займалася пераважна «будаўніцтвам паветраных замкаў», перастала плаціць работнікам і зачыніла офіс прынамсі на месяц.
Работнікі групы кампаніяў «Blockchain Sports Ecosystem» паскардзіліся выданню Devby.io на затрыманні ў заробках. Як выявілася пазней, кампанія сышла ў прастой.
Увосень мінулага года «Blockchain Sports» нарабіла шуму ў простым і пераносным сэнсах: для здымак сваёй рэкламы ладзіла заезды-дрыфты на цэнтральных вуліцах беларускіх гарадоў, запрасіла нават нямецкага актора Тыля Швайгера. Апошняму давялося апраўдвацца: падобна, ён не разумеў, куды прыехаў, а ягоным прыездам скарысталася дзяржаўная прапаганда.
«Blockchain Sports» і яшчэ доўгі шэраг кампаніяў заснаваў прадпрымальнік Дзмітрый Саксонаў, якога ў канцы 2018-га асудзілі на чатыры гады калоніі ўзмоцненага рэжыму з канфіскацыяй маёмасці за махлярства. Па вызваленні ён стаў наведваць арабскія краіны, дзе пасябраваў з будаўнікамі фінансавых пірамідаў, затым вярнуўся ў Беларусь і стаў анансаваць мноства фантастычных праектаў. Для аднаго з іх ён прывёз у Беларусь колішніх футбольных зорак, атрымаў спрыянне чальца Савету Рэспублікі Дзмітрыя Баскава.
Праекты Саксонава яднае выкарыстанне або абяцанне выкарыстання нейрасетак – і прапанова інвеставаць. Адзін з праектаў абяцаў ствараць праз нейрасеткі музыку, другі заклікаў укладвацца ў маштабныя будаўнічыя праекты і паказваў толькі згенераваныя нейрасеткамі малюнкі, трэці абяцаў праграму аналізу твараў нейрасеткамі, чацвёрты абяцаў аналіз паказнікаў спартоўца нейрасеткамі, экзашкілет і акуляры для трэнінгаў у дапоўненай рэальнасці, пяты не раскрываў, чым займаецца, але наймаў людзей пераважна са сфераў рэкрутынгу і PR'у…
Паводле Devby.io, у адной з кампаніяў Саксонава працавалі ад 800 да 1000 чалавек. Работнікі расказвалі, што не атрымлівалі заробкаў са студзеня, ім былі вінныя грошы за два ці тры месяцы, а то і больш. Некаторыя казалі, што і перад гэтым былі затрыманні выплатаў. Праз брак грошай работнікаў не маглі звольніць, бо з імі не было чым разлічыцца. Кіраўніцтва казала, што гэта выкліканае адсутнасцю інвестыцыяў і заклікала працаўнікоў шукаць інвестараў.
Для той кампаніі Саксонава знялі раскошны офіс, прапаноўвалі сняданкі і абеды, раздалі працаўнікам тэхніку «Apple», ладзілі мноства імпрэзаў, нават паставілі кальяны на гаўбцы. Ды адзін з работнікаў казаў, што ў кампаніі «агромістая колькасць праектаў, а для чаго яны і што з імі, незразумела». Другі казаў, што большая частка праектаў не манетызуецца, а некаторыя нават не выйшлі з этапу задумы на этап вытворчасці.
Нешта яны ўсё ж вырабілі. Вынік спрэчны
Адна з кампаніяў Саксонава – мультыплікацыйная «Arteki Studio», якая абяцала рабіць праз генератыўныя нейрасеткі мультфільмы «лепш за „Disney“ ці „Pixar“». Кампанія выдала шмат «трэйлераў» розных мультфільмаў. Да публічных паказаў давялі толькі адзін: «Белавежская пушча».
У дзяржаўных медыях на мультфільм былі вельмі пазітыўныя водгукі, тады як водгукі незалежных гледачоў – ад змяшаных да рэзка негатыўных. Крытыкавалі і сюжэт, і нізкую якасць анімацыі: было відаць, што персанажы рухаюцца ненатуральна, не трапляюць ратамі ў агучку, у іх часам знікаюць зубы ці мяняецца колькасць пальцаў, мяняецца і сам дызайн персанажаў. З апублікаваных кадраў мультфільма бачна, што яго стваралі або з дапамогай агульнадаступных генератараў выяваў і відэа, або з уласнай распрацоўкай, не лепшай за ўжо існыя.
Алесь Наваборскі belsat.eu
