На ягонае месца прызначылі намесніка кіраўніка адміністрацыі Лукашэнкі, а яго не перавялі на іншую пасаду, а проста адставілі.
Аляксандр Лукашэнка 27 сакавіка чарговы раз пераставіў кадры. Ранкам 28 сакавіка быў афіцыйна апублікаваны шэраг указаў аб прызначэннях. З аднаго з указаў стала вядома пра звальненне першага намесніка старшыні праўлення Нацыянальнага банку Сяргея Калечыца.
Ва ўказе пазначана, што Калечыца вызвалілі з пасады. У адрозненне ад некаторых іншых указаў, у гэтым няма інфармацыі, што яго пераводзяць на іншую пасаду.
Калечыц працаваў у Нацыянальным банку з 1995 года, у 2013-м быў прызначаны намеснікам старшыні праўлення, у 2021-м – першым намеснікам старшыні праўлення.
На ягонае месца 27 сакавіка Лукашэнка прызначыў Аляксандра Ягорава – колішняга старшыню праўлення Банку развіцця, які ўсяго год таму быў прызначаны намеснікам старшыні адміністрацыі Лукашэнкі.
Старшыня праўлення Нацбанку змяніўся 10 сакавіка: на месца Паўла Калавура, які кіраваў цэнтральным банкам Беларусі больш за дзесяць гадоў, прызначылі экс-прэм’ера Рамана Галоўчанку. Эксперты пачалі непакоіцца за Нацбанк: Калавур намагаўся праводзіць рацыянальную палітыку, пра Галоўчанку ж Лукашэнка казаў, што той хацеў «большай уцягнутасці банку і банкаўскай сістэмы ў эканоміку».
Калавура маглі зняць з прычыны ягонай нязгоды з палітыкаю выдачы крэдытаў расейскім прадпрыемствам у канцы 2024 года. Альбо маглі зняць за ягоныя спробы абмежаваць выдачу крэдытаў неплацежаздольным дзяржаўным прадпрыемствам. Альбо проста за спробы захаваць незалежнасць Нацбанку ад ураду.
Алесь Наваборскі belsat.eu
