Прэзідэнт Украіны Уладзімір Зяленскі заявіў, што цягам 2025 года Расея размесціць свае войскі на тэрыторыі Беларусі, каб паступова ўцягнуць нашую краіну ў вайну. Як бы пацвярджаючы гэтыя словы, Уладзімір Пуцін унёс на ратыфікацыю ў Дзярждуму дамову з Беларуссю аб гарантыях бяспекі, якая прадугледжвае дазвол на размяшчэнне расейскіх вайсковых базаў і аб'ектаў у Беларусі на наступныя 10 гадоў. Наколькі сур'ёзная небяспека?
Уладзімір Зяленскі лічыць намеры аб размяшчэнні расейскіх войскаў у Беларусі цалкам сур'ёзнай пагрозай.
«Шмат еўрапейцаў і ЗША будуць казаць, што гэта запужванне Польшчы, Літвы і іншых краінаў. Але вы пабачыце, ён будзе рабіць усё, каб уцягнуць іх, будзе правакаваць іх», – лічыць прэзідэнт Украіны.
Пра тое што на тэрыторыі Беларусі сёлета размесцяць расейскія войскі, сталася вядома яшчэ летась. Тады анансавалася, што ў наступную восень у нашай краіне пройдуць вучэнні «Захад-2025». Беларускае Міністэрства абароны назвала манеўры самымі маштабнымі за апошнія гады. Запланаваны ўдзел больш як 13 тысяч чалавек асабовага складу. 10 студзеня беларускі бок папярэдзіў пра вучэнні АБСЕ.
Кіраўнік Народнага антыкрызіснага ўпраўлення Павел Латушка таксама схільны лічыць, што пагроза існуе.
,,«На тэрыторыі дзяржаваў-удзельніц гэтых міжнародных дамоваў вайсковыя вучэнні з колькасцю больш за 40 тысяч могуць праводзіцца не часцей аднаго разу на тры гады. Мы можам меркаваць, што ў гэтых вучэннях будуць удзельнічаць не менш за 40 тысяч чалавек, таму што якраз прайшло тры гады, як праходзілі так званыя вайсковыя вучэнні», – нагадвае Павел Латушка.
У той жа час у аўторак Уладзімір Пуцін унёс на ратыфікацыю ў Дзярждуму дамову з Беларуссю аб гарантыях бяспекі. Яе падпісалі яшчэ на пачатку снежня мінулага года ў Менску.
Расейскія дэпутаты паабяцалі разгледзець дакумент у прыярытэтным парадку. Адметна, што дамова не толькі прадугледжвае ўключэнне Беларусі ў ядравую дактрыну Расеі. Асобна пятым пунктам даецца дазвол на размяшчэнне расейскіх вайсковых базаў і аб'ектаў у Беларусі на наступныя 10 гадоў.
,,«Яны любяць перастрахоўвацца. Напрыклад, на выпадак смерці дыктатара Лукашэнкі. Прыходзіць пераемнік прарасейскі, непрарасейскі. Але ёсць юрыдычны дакумент, вы абавязаныя выконваць. Мы ўводзім войскі для вырашэння інтарэсаў сваіх, каб гэтая краіна не адышла да дэмакратычнага свету. Вось глядзіце: папера ёсць, яна была падпісаная», – тлумачыць магчымую логіку саюзнікаў прадстаўнік «BELPOL» Андрэй Астаповіч.
Дакумент прадугледжвае таксама магчымасць адпраўляць беларускіх вайскоўцаў на абарону тэрытарыяльнай цэласнасці Расеі. У выпадку, калі тая звернецца з такім запытам.
«Рашэнне аб накіраванні вайскоўцаў Беларусі на тэрыторыю трэцяй дзяржавы знаходзіцца ў кампетэнцыі УНС. На зварот Пуціна аб накіраванні вайскоўцаў для агрэсіі супраць Украіны ён можа сказаць, што УНС не падтрымала гэтага рашэння, а пераскочыць праз орган я не магу. Або, наадварот, дасць каманду сваім слугам, і яны адзінагалосна прагаласуюць «за», – нагадвае Павел Латушка.
Надоечы аб'яднанне былых сілавікоў «BELPOL» здабыло закрыты ліст Генеральнай пракуратуры ў Савет Міністраў, складзены яшчэ ў 2023 годзе. У ім пракуратура скардзіцца на дзяржпрадпрыемствы, якія не рамантуюць транспарту, што мусіць выкарыстоўвацца войскам падчас вайны. Тады выпісалі больш за сотню актаў пракурорскага нагляду.
Гэтыя і іншыя дзеянні ўладаў сведчаць пра падрыхтоўку да нейкіх ваенных дзянняў, адзначаюць эксперты.
«Калі вывучыць усе змены заканадаўства, пра акопы, рамонт бамбасховішчаў, змены МНС, як яны мусяць дзейнічаць пры разборы завалаў... Усё сведчыць пра тое, што яны падганяюць заканадаўства, праводзяць вучэнні, тактычныя вучэнні, і напал у рэгіёне павышаецца», – кажа Андрэй Астаповіч.
Апошні год у Беларусі рэгулярнымі зрабіліся вучэнні тэрытарыяльнай абароны і правяранні боегатоўнасці. Напрыканцы студзеня тэрабарона трэнавалася ў Добрушскім раёне ля самай мяжы з Украінай.
Антон Бяздольны belsat.eu
