Незалежная выстава «Застацца», натхнёная постаццю і мастацтвам Алеся Пушкіна, беларускага мастака і грамадскага актывіста, адкрыецца ў Музеі Вольнай Беларусі ў Варшаве 6 жніўня. У арт-праекце прэзентуюць адну з працаў мастака. Усе астатнія экспанаты – іншых мастакоў, якія захочуць узяць удзел.
«Гэтая мастацкая падзея не прысвечаная беспасярэдне асобе Алеся Пушкіна, а ёсць спробаю заглянуць глыбей – убачыць, як ягонае жыццё і творчасць уплываюць на сучасных мастакоў ды іхныя творы. Менавіта зварот сучаснікаў да творчасці Алеся і натхненне ягонымі працамі – асноўная ідэя выставы. Працяг лініі творчасці Пушкіна дазваляе яму заставацца з намі і ўплываць на сучаснае мастацтва», – падзялілася менеджарка ініцыятывы Ліза.
Мэта праекту – сабраць працы беларускіх і замежных мастакоў, якія былі створаныя пад уплывам творчасці Пушкіна і працягваюць ягоную мастацкую традыцыю ў сучасным кантэксце. На выставе прэзентуюць адзін з твораў мастака. Які менавіта – галоўная інтрыга арт-праекту.
Арганізатары ініцыятывы ў справе захавання памяці Алеся Пушкіна апавялі пра рыхтаванне да выставы:
,,«Мы робім усё магчымае, каб прывезці адзін са значных твораў Алеся з прыватнай калекцыі з Беларусі. Але на гэты момант, як бы моцна мы ні стараліся, гэтая спроба застаецца немагчымаю. Затое пры спрыяльных умовах увазе наведнікаў будзе прэзентаваная іншая праца з цікаваю гісторыяй. Мы робім усё магчымае, каб гэты знакавы твор трапіў на выставу ў Варшаве.
Асоба мастака выклікае цікавасць і жаданне праявіць салідарнасць: мы бачым гэта паводле колькасці заявак ад удзельнікаў. Адным з вынікаў імпрэзы станецца арганізацыя аўкцыёну працаў удзельнікаў. Спадзяёмся, такім чынам нам удасца дапамагчы мастакам у выгнанні, якім крытычна неабходныя падтрыманне і проста ўвага грамадства».
«Алесь Пушкін. Застацца» можа набыць трансатлантычнае вымярэнне – гаворка пра ўдзел у выставе працы мастачкі з ЗША.
Ініцыятары праекту абвесцілі оўпэн-кол, які працягнецца да 20 траўня. Да ўдзелу запрашаюцца мастакі, якія жывуць у Польшчы і краінах-суседках Еўразвязу. Падаць заяўку можна праз спасылку.
Экспазіцыя не абмяжуецца жывапісам: падаць заяўку могуць тыя, хто працуе ў такіх формах мастацтва, як відэа, перформанс, інсталяцыя і фатаграфія.
Вызначаны шэраг тэмаў, якія аб’ядноўваюць асноўную канцэпцыю праекту:
– тэма міграцыі і трансфармацыі;
– пошук ідэнтычнасці;
– тэма дому і досведу жыцця «паміж» – краінамі, мовамі і станамі;
– асабістае перажыванне і мастацкае сведчанне.
Працягваецца збор сродкаў на арганізацыю праекту: падтрымаць яго можна праз платформу Gronka. Больш буйныя донары атрымаюць магчымасць узяць удзел у выбары аднаго з твораў для выставы.
Нагадаем, што ў мінулым годзе ў Музеі Вольнай Беларусі прайшла выстава «Алесь Пушкін: Afterlife», прысвечаная памяці мастака і зарганізаваная мастаком ды куратарам Андрэем Дурэйкам.
Алесь Пушкін – беларускі мастак, перформер, грамадскі актывіст, змагар за свабоду Беларусі, палітычны вязень. Ягонае жыццё трагічна абарвалася ў 2023 годзе ў Гарадзенскай турме № 1. Сёлета яму споўнілася б 60 гадоў.
Наста Пабягунская belsat.eu
