Некалькі сваякоў палітвязняў сталі ахвярамі махляроў, якія прыдумалі чарговую схему. Яны прадстаўляюцца блізкімі да ўладаў і бяруць грошы нібыта за памілаванне палітвязняў. Пра гэта паведамляюць праваабаронцы «MAYDAY.TEAM».
Ашуканцы сцвярджаюць, што з дапамогай сваіх сувязяў ва ўладзе вырашаць пытанне з памілаваннем за два месяцы. Каб іх гісторыя працавала лепш, зламыснікі падмацоўваюць свае апавяданні навінамі з дзяржаўных і недзяржаўных СМІ.
«Некаторыя матэрыялы з сайтаў, прызнаных нібыта "экстрэмісцкімі" яны спецыяльна адкрыта посцяць, каб паказаць, што ім усё сыдзе з рук.
Зламыснікі сцвярджаюць, што пытанне памілаванняў пастаўлена нібыта на паток, а кошт пытання – 5000 долараў ЗША. Пры гэтым гаворка нібыта ідзе не толькі пра палітычныя артыкулы. Задатак у дзве тысячы бярэцца адразу, а пасля "памілухі" трэба будзе перадаць яшчэ тры тысячы. Ашуканцы добра валодаюць юрыдычнай мовай і нават распавядаюць цалкам алгарытм, як менавіта робіцца памілаванне. Аднак пасля атрымання задатку яны знікаюць», – піша «MAYDAY.TEAM».
Гэта не першы раз, калі рэпрэсіі выкарыстоўваюцца ашуканцамі як яшчэ адзін спосаб падмануць людзей.
Былі зафіксаваныя выпадкі, калі ашуканцы прадстаўляліся сілавікамі, пагражалі людзям, а потым прапаноўвалі адкупіцца. Пры гэтым не толькі тэлефанавалі, але і прыходзілі да ахвяраў дадому.
Арсен Рудэнка belsat.eu
