У Беларусі ашуканцы прыдумалі новую легенду, каб людзі пераводзілі ім грошы ці аддавалі звесткі банкаўскіх картак. Цяпер яны выдаюць сябе і за кіраўнікоў тых, каго спрабуюць падмануць, паведамляе менская міліцыя.
Паводле міліцыі, ашуканцы пішуць ад імя кіраўнікоў ахвяраў і кажуць, што з імі павінен звязацца прадстаўнік правяральнага ведамства. Пра размову просяць нікому не апавядаць, у тым ліку калегам.
«Пасля званка ад "начальніка" з чалавекам звязваецца іншы махляр, які называецца супрацоўнікам праваахоўных органаў. Далей схема класічная: "Вашыя грошы выкралі, давайце перавядзём на бяспечны рахунак..."», – піша менская міліцыя.
Раней ашуканцы звычайна называліся работнікамі банкаў, нават Нацбанку, аператарамі сотавай сувязі, прадстаўнікамі «Белпошты».
Каб засцерагчы сябе, нельга давяраць паведамленням і званкам з незнаёмых нумароў, нават калі суразмоўца здаецца знаёмым чалавекам.
Таксама нельга перадаваць звестак сваіх картак, коды з СМС-паведамленняў, логіны і паролі.
Калі вы не ўпэўненыя, што вам сапраўды тэлефануе кіраўнік, то звяжыцеся з ім у іншым мэсэндажы або патэлефануйце.
Арсен Рудэнка belsat.eu
