Самалёт Стывэна Ўіткафа, адмысловага пасланніка прэзідэнта ЗША Доналда Трампа, прызямліўся 13 сакавіка ў маскоўскім аэрапорце «Унукава».
Як адзначае ТАСС, Стывэн Ўіткаф прыляцеў у Расею з Катару. Перад тым ён удзельнічаў у перамовах з Украінаю ў Саудаўскай Аравіі. Картэж з аэрапорту «Унукава-2» скіраваўся ў Маскву.
12 сакавіка прэс-сакратарка Белага дому Кэралайн Левіт паведаміла, што Ўіткаф адправіцца ў Маскву, каб абмеркаваць урэгуляванне вайны ва Украіне.
«Сапраўды, перамоўнікі ляцяць, сапраўды, кантакты запланаваныя. Мы не будзем забягаць наперад, потым раскажам», – сказаў на брыфінгу прэс-сакратар кіраўніка РФ Дзмітрый Пяскоў.
З ягоных словаў, расейска-амерыканскія кантакты пасля перамоваў ЗША і Украіны ў Саудаўскай Аравіі ўжо былі: 12 сакавіка адбылася тэлефонная размова памочніка прэзідэнта ЗША ў нацыянальнай бяспецы Майка Ўолтца і памочніка Уладзіміра Пуціна Юрыя Ушакова.
Нагадаем, што еўрапейская выведка займела дакумент з патэнцыйнымі патрабаваннямі Расеі на перамовах адносна заканчэння вайны ва Украіне. Яны, сярод іншага, уключаюць у сябе «дэмантаж кіеўскага рэжыму».
Якуб Хруст belsat.eu
