Савет Міністраў зацвердзіў канцэпцыю дзяржаўнай жыллёвай палітыкі да 2030 года. Дакумент 13 сакавіка быў апублікаваны на Нацыянальным прававым інтэрнэт-партал. Міністэрству будаўніцтва і архітэктуры даручана цягам двух месяцаў унесці ва ўрад план дзеянняў для рэалізацыі канцэпцыі.
Канцэпцыя прапануе працягнуць дзяржаўнае падтрыманне сярэдняга класу для будавання і куплі жытла, а для малазабяспечаных грамадзянаў – развіваць арэнднае жытло з выкарыстаннем паніжальных каэфіцыентаў да арэнднай платы або яе скасаваннем.
У выніку рэалізацыі канцэпцыі плануецца, што забяспечанасць насельніцтва агульнаю плошчаю жытла мусіць дасягнуць 33 кв. м на асобу, а доля арэнднага жытла і жылых памяшканняў сацыяльнага карыстання скласці 5 % у агульным аб'ёме жыллёвага фонду. Суадносіны сярэдняга кошту 1 кв. м агульнай плошчы жытла, пабудаванага з дзяржаўным падтрыманнем (без індывідуальных забудоўнікаў), і намінальнага налічанага сярэдняга заробку мусяць быць не большымі за 1. Колькасць семʼяў, якія былі на ўліку і палепшылі жыллёвыя ўмовы, – не меншай за 4 % штогод ад агульнай колькасці грамадзянаў, якія стаяць на ўліку.
Абʼёмы рэканструкцыі (рэнавацыі) існых жылых дамоў мусяць скласці штогод не менш як 3 % ад неўладкаванага жыллёвага фонду ў гарадах і не менш як 1 % у сельскіх населеных пунктах. Удзельная вага агульнай плошчы жылых памяшканняў, абсталяваных водаправодам і каналізацыяй, мусіць скласці не менш як 92 % у гарадской мясцовасці і не менш як 60 % у сельскай.
Рэнавацыя хрушчовак
Канцэпцыя прапануе рэнавацыю і капітальны рамонт хрушчовак 1955–1975 гадоў – «жыллёвага фонду, які паступова маральна і фізічна старэе». Як заяўляецца, агульная плошча такіх дамоў – каля 10 млн кв. м.
,,«Кватэры ў такіх дамах не адпавядаюць сучасным спажывецкім патрабаванням насельніцтва. Таксама існуюць праблемы высокага расходу энергарэсурсаў на ацяпленне гэтых дамоў», – гаворыцца ў дакуменце.
У межах рэнавацыі плануецца перамясціць акцэнты з колькаснага забеспячэння грамадзянаў жытлом на паляпшэнне якасных характарыстык жытла. Таксама прапануецца наданне састарэлым дамам, раёнам, кварталам новых якасных характарыстык, якія не саступаюць новабудоўлям, палепшыўшы іх тэхнічна-эканамічныя паказнікі, навакольную інфраструктуру, развіваючы энергазберагальныя і іншыя тэхналогіі, а таксама ўзводзячы новыя жылыя дамы наўзамен знесеных.
Уласнікам дамоў, якія збіраюцца зносіць ці абнаўляць, абяцаюць грашовую кампенсацыю або раўназначнае паводле плошчы жытло.
Дэўрбанізацыя
Мяркуецца распрацаваць захады стымулявання развіцця дзяржаўнай сістэмы жыллёва-будаўнічых ашчаджэнняў і іпатэчнага крэдытавання. Сярод асноўных напрамкаў горадабудаўнічай палітыкі ёсць развіццё і ўзмацненне канкурэнтаздольнасці гарадоў і іншых населеных пунктаў на падставе агламерацыйных працэсаў.
Дакумент прапануе далейшае развіццё гарадоў-спадарожнікаў, жытло ў іх будзе будавацца перш за ўсё для чаргавікоў, а таксама шматдзетных семʼяў, семʼяў з інвалідамі, інвалідаў з дзяцінства. Гарадамі-спадарожнікамі для Менску названыя Смалявічы, Рудзенск, Дзяржынск, Лагойск, Фаніпаль, Заслаўе, для Берасця – Жабінка, а для Горадні – Скідзель.
Прыярытэтным напрамкам жыллёвага будаўніцтва ў рэгіёнах мусіць стаць «рацыянальнае выкарыстанне патэнцыялу дзейнай жылой забудовы за кошт залучэння ў гаспадарчы абарот для мэтаў індывідуальнага жыллёвага будаўніцтва нявыкарыстаных зямельных участкаў». Таксама будуць фінансаваць рэканструкцыю інфраструктуры ў дзейнай індывідуальнай жылой забудове. Пры гэтым мяркуецца скарачаць абʼём будавання ў гарадах, а павялічваць яго ў сельскай мясцовасці ў мэтах «дэўрбанізацыі».
Павышаць прывабнасць гарадскіх тэрыторыяў мяркуецца «на падставе рэнавацыі дзейных жылых дамоў з адначасовым захаваннем і эфектыўным развіццём групавых сістэмаў сельскіх населеных пунктаў і тэрыторыяў на аснове комплекснага планавання.
Для развіцця індывідуальнага будавання мяркуецца даваць участкі ва ўжо існых раёнах. Адзначаецца, што рэканструкцыя сетак у такіх раёнах патрабуе выдаткаў у 2,5 разу меншых, чым будаванне новай інфраструктуры.
Для развіцця населеных пунктаў з насельніцтвам да 20 тыс.асобаў плануецца павялічыць памер дзяржаўнага падтрымання грамадзянам пры жыллёвым будаванні ў такіх населеных пунктах з прызначэннем гранічнага нарматыву цаны 1 кв. м жытла ў памеры 90 % фактычнага кошту. Таксама мяркуецца разгледзець пытанне дзяржпадтрымання куплі жытла на другасным рынку ў такіх населеных пунктах.
Таксама для павышэння даступнасці жытла прапануецца будаванне «электрадомаў», павелічэнне будавання арэнднага жытла, развіццё лізінгу жылых памяшканняў. Мяркуецца ўкараніць інфармацыйную сістэму «Дзяржаўная жыллёвая палітыка», каб «скараціць часавыя, арганізацыйныя і фінансавыя выдаткі субʼектаў будаўнічай дзейнасці».
Канцэпцыя прадугледжвае, што грамадзяне будуць набываць гатовае жытло, а не ўдзельнічаць у яго будаванні, якое «спалучанае з рызыкамі стратаў фінансавых сродкаў з прычыны нядобрасумленных паводзінаў забудоўніка або яго неплатаздольнасці або банкруцтва». Таксама плануецца стварыць алгарытмы і механізмы, якія б максімальна абаранялі інвестараў на рынку будавання жытла.
Якуб Хруст belsat.eu
