Кіраўнік Беларусі Аляксандр Лукашэнка раніцаю 13 сакавіка прыляцеў у Маскву, дзе ў яго запланаваныя перамовы з Уладзімірам Пуціным.
Пра прылёт ягонага самалёту паведамляе «Пул Первого».
З якім фармальным статусам Аляксандр Лукашэнка прыляцеў у Маскву, не ўдакладняецца, бо чарговая інаўгурацыя пасля «выбараў» 26 студзеня яшчэ не была праведзеная.
Апошні раз Лукашэнка бачыўся з Уладзімірам Пуціным у канцы снежня. Пра змест перамоваў Лукашэнка тады сказаў, што «калі старэйшы брат з малодшым сустракаюцца, тэматыка занадта шырокая». Таксама ён паведаміў, што прасіў у Расеі дзясятак ракетных комплексаў «Арэшнік».
Лукашэнка сёлета прынамсі двойчы размаўляў з Пуціным праз тэлефон: 19 і 27 студзеня.
Новая сустрэча адбудзецца на фоне амерыканска-ўкраінскай прапановы спыніць агонь ва Украіне і расейскай ідэі збудаваць у Беларусі завод беспілотнікаў.
Якуб Хруст belsat.eu
