Пандэмія COVID-19 магла пачацца праз выцек віруса SARS-CoV-2 з лабараторыі ў кітайскім Ўухані. Да такіх высноваў прыйшла нямецкая Федэральная выведная служба BND яшчэ ў 2020 годзе.
Як адзначае «Deutsche Welle» са спасылкаю на «Süddeutsche Zeitung» і «Zeit», правесці расследаванне ў гэтай сувязі даручыла спецслужбе ведамства федэральнага канцлера, і менавіта яно пасля засакрэціла атрыманую інфармацыю.
Аналіз BND абапіраецца на адкрытыя крыніцы. У прыватнасці, гаворка пра навуковыя звесткі з кітайскіх даследчых інстытутаў, у тым ліку Ўуханскага інстытуту вірусалогіі. У матэрыялах паведамляецца не толькі пра рызыкоўныя эксперыменты, падчас якіх натуральныя вірусы штучна мадыфікаваліся, але і пра шматлікія парушэнні правілаў бяспекі ў лабараторыях.
Паводле журналістаў, падчас кіравання Ангелаю Мэркель нямецкім урадам кіраўнік BND Бруна Каль асабіста інфармаваў ейны офіс пра расследаванне паходжання каронавіруса.
Імавернасць яго лабараторнага паходжання ацэньвалася ў гэтых справаздачах на 80–95 %, аднак ведамства федэральнага канцлера пастанавіла не паведамляць пра гэта грамадскасці. Таксама нікога не інфармаваў і ейны пераемнік Оляф Шольц.
Цяпер нямецкія палітыкі патрабуюць найбліжэйшымі днямі праінфармаваць пра сітуацыю камітэт Бундэстагу ў пытаннях кантролю за дзейнасцю спецслужбаў.
Са снежня 2024 года нямецкі ўрад даручыў навукоўцам праверыць абгрунтаванасць высноваў BND. Канчатковы вынік пакуль невядомы.
Новы смяротна небяспечны каронавірус быў зафіксаваны ў Кітаі менавіта ў тым горадзе, дзе працавала лабараторыя, якая б даследавала самыя небяспечныя вірусы ў свеце, Ўухані. Адкрыццё лабараторыі выклікала занепакоенасць навукоўцаў за межамі Кітаю, якія турбаваліся, што патагенныя мікраарганізмы могуць выслізнуць. Таксама яны хваляваліся, што гэта можа стварыць дадатковую напружанасць у стасунках паміж Кітаем ды іншымі краінамі.
У 2020 годзе адміністрацыя прэзідэнта ЗША Доналда Трампа даручыла спецслужбам праверыць інфармацыю пра магчымае ўтойванне фактаў пра распаўсюд каронавіруса з боку Кітаю ці Сусветнай арганізацыі здароўя.
Сам Трамп заяўляў, што бачыў доказы, якія звязваюць каронавірус COVID-19 з лабараторыяй ва Ўухані. Таксама дзяржаўны сакратар ЗША Майк Пампэёў казаў, што ёсць звесткі, паводле якіх COVID-19 пачаў распаўсюджвацца па свеце з лабараторыі ў кітайскім горадзе Ўухань. Аднак сам вірус пры гэтым быў прыроднага, а не штучнага паходжання.
Якуб Хруст belsat.eu
