Абраная прэзідэнтка Беларусі Святлана Ціханоўская і Міністэрства замежных справаў нашай краіны завочна паспрачаліся адносна сэнсу і значэння санкцыяў у дачыненні калійных угнаенняў. Пры гэтым МЗС нават зняпраўдзіла словы кіраўніка Беларусі Аляксандра Лукашэнкі.
Падчас брыфінгу ў Атаве (Канада) з удзелам амбасадараў краінаў Еўразвязу абраная прэзідэнтка Беларусі Святлана Ціханоўская адзначыла, што санкцыі «не панацэя, але эфектыўны інструмент аслаблення [Аляксандра] Лукашэнкі», што, у сваю чаргу, аслабляе і Уладзіміра Пуціна. Найбольш балючымі, на ейную думку, ёсць санкцыі ў дачыненні вайскова-прамысловага комплексу, нафтахіміі, банкаўскага сектару і калійных угнаенняў, піша «Позірк».
«З калійнымі ўгнаеннямі Канада асабліва дапамагла. Адпраўляючы больш калію на сусветны рынак, Канада істотна падарвала адну з ключавых крыніцаў даходаў Лукашэнкі», – сказала Ціханоўская.
Яна падкрэсліла неабходнасць «заклікаць да выключэння рэжыму Лукашэнкі з сістэмы Інтэрполу і спыніць любыя пагадненні аб экстрадыцыі і дэпартацыі, бо рэжым карыстаецца імі для палітычнага пераследу». Паводле Ціханоўскай, гэта даказваюць сітуацыі з затрыманым у Сербіі рэжысёрам Андрэем Гнётам і экстрадаваным з В’етнаму экс-ваяром палка Каліноўскага Васілём Верамейчыкам.
Ціханоўская заклікала «ізалюючы рэжым, падтрымаць народ», узмацніўшы мабільнасць беларусаў, выдаючы больш візаў і падтрымліваючы сувязь беларусаў з Еўропай, а таксама дапамагаць незалежным медыям, грамадзянскай супольнасці і праваабаронцам, падтрымліваць беларускую культуру і мову.
МЗС супраць Ціханоўскай і Лукашэнкі
Між тым у МЗС Беларусі паведамілі, што на 52-й сесіі Рады прамысловага развіцця UNIDO ў Вене (Аўстрыя), якая прайшла 25–27 лістапада, была прынятая супольная заява Беларусі, Венесуэлы, Ірану, Кітаю, КНДР, Кубы, Нікарагуа, Палестыны, Расеі, Сірыі ды Судану супраць санкцыяў. Апошнія былі названыя «аднабаковымі прымусовымі захадамі – АПЗ».
Паводле гэтых краінаў, санкцыі ўскладняюць сітуацыю з ліквідацыяй голаду і ўсіх формаў недаядання ды з забеспячэннем доступу насельніцтва да харчавання ў тым ліку «шляхам запэўнівання бесперабойнага паступлення сельскагаспадарчага абсталявання, угнаенняў, а таксама кампанентаў для яго вытворчасці». У заяве адзначаецца, што санкцыі «маюць наўпроставае ўздзеянне на гандлёвыя плыні і ствараюць дадатковыя цяжкасці для дзяржаваў у іх намаганнях для ліквідацыі голаду і ўсіх формаў недаядання і забеспячэння харчовай бяспекі».
У дакуменце адзначаецца, што санкцыі «нелегітымныя, неправамерныя, супярэчаць Статуту ААН і прынцыпам міжнароднага права».
Лукашэнка казаў іншае
Улады Беларусі не ўпершыню кажуць, што санкцыі супраць беларускага калію б’юць па глабальнай харчовай бяспецы. Але 4 лістапада сёлета Лукашэнка заявіў, што цяпер айчынныя калійныя ўгнаенні прадаюцца «за бясцэнак, амаль за сабекошт, а то і ніжэй часам». Каб гэтага не было, ён хоча знізіць вытворчасць.
«Можа быць, нам з расейцамі перагаварыць, параіцца і адсоткаў на 10, можа, 11, знізіць здабычу калійных угнаенняў. Не тое што дэфіцыт на рынку з’явіцца, а ўсе зразумеюць, што гэта дарагая прадукцыя і за яе трэба плаціць адпаведныя сродкі», – сказаў палітык.
На крывадушнасць Лукашэнкі звярнуў увагу палітолаг Дзмітрый Балкунец: «Лукашэнка шмат казаў, што ў Афрыцы голад наступіць праз калійныя ўгнаенні, калі цэны там вырастуць. Гэта значыць, атрымліваецца, ён хоча, каб Афрыка галадала, раз ён хоча цэны павысіць».
Якуб Хруст belsat.eu
