З 1 сакавіка выходныя званкі і інтэрнэт у роўмінгу ў межах гэтак званай саюзнай дзяржавы будуць каштаваць, як званкі ў хатняй сетцы. Але ёсць верагоднасць, што тэрміны зноў могуць перанесці.
Пра дасягненне канчатковай дамоўленасці паміж дзвюма краінамі ў пытанні адмены роўмінгу 5 лістапада паведаміў прэм'ер-міністр Беларусі Раман Галоўчанка па выніках пасяджэння Саўміну Саюзнай дзяржавы, перадае БелТА.
Паводле Галоўчанкі, з 1 сакавіка 2025 года мабільныя аператары маюць забяспечыць абанентам дзвюх краінаў ва ўзаемным роўмінгу сувязь паводле тарыфаў на ўзроўні хатняй сеткі. У дадатак да гэтага – не меней за 300 хвілінаў бясплатных ўваходных званкоў і не менш як 5 гігабайтаў інтэрнэту за месяц.
Нагадаем, што адмену роўмінгу ў Саюзнай дзяржаве абмяркоўваюць ажно з 2018 года. Але за гэты час бясплатнымі сталі толькі ўваходныя званкі ў роўмінгу.
Дамовіцца пра зніжэнне кошту выходных званкоў усё ніяк не атрымліваецца. Раней у расейскім МЗС называлі датаю скасавання роўмінгу ў Саюзнай дзяржаве 1 студзеня 2025 года. Цяпер гэты тэрмін перанеслі яшчэ на два месяцы – да 1 сакавіка 2025-га.
Надзея Вольная belsat.eu
