У Беларусі ўстанавілі максімальныя адпускныя і рознічныя цэны на шэсць відаў агародніны і яблыкі. Гэта прадугледжана пастановаю Савету Міністраў № 713 (5) ад 16 кастрычніка, апублікаванаю 18 кастрычніка на Нацыянальным прававым інтэрнэт-партале.
З 21 кастрычніка да траўня 2025 года вызначаюцца гранічныя максімальныя адпускныя цэны, а з 29 кастрычніка да траўня 2025 года — гранічныя максімальныя раздробныя цэны на свежыя агуркі, яблыкі, рэпчатую цыбулю, бульбу, сталовыя буракі, моркву, акрамя мытых. Таксама зніжаныя надбаўкі імпарцёра на грэцкія крупы, макароны з пшаніцы, сокі і нектары, панчошна-шкарпэткавыя вырабы, керамічную плітку, зубную пасту.
Як вынікае з пастановы, самай дарагой агародніна будзе ў траўні 2025 года. Пік коштаў на агуркі прыпадзе на снежань 2024 года, а да траўня яны маюць патаннець.
«Гэтыя змены прынятыя ў мэтах забеспячэння падтрымання айчынных вытворцаў і стварэння ўмоваў для прасоўвання тавараў, што вырабляюцца ў Рэспубліцы Беларусь», — заявілі ва ўрадзе.
Там адзначылі, што вывелі з цэнавага рэгулявання тавары высокага коштавага сегменту, што належаць да тавараў раскошы і прэміум-класу.
Пастаўнікам тавараў дадзеная магчымасць замаўляць у суб’ектаў гандлю паслугі захоўвання прадукцыі, што прадугледжваюць забеспячэнне яе якасці і захаванне адмысловых тэмпературных рэжымаў. Пры гэтым суб’ектам, што ажыццяўляюць раздробны гандаль і аказваюць паслугі захоўвання тавараў, назначаюцца адзіныя тарыфы на такія паслугі.
У Беларусі ўводзіцца ліцэнзаванне экспарту капусты, цыбулі і яблыкаў. Робіцца гэта, каб выключыць іх некантраляваны вываз, бо «гэтага тавару можа не хапіць да канца міжсезоннага перыяду», заявіў міністр антыманапольнага рэгулявання і гандлю Аляксей Багданаў.
Якуб Хруст belsat.eu
