У пункце пропуску «Варшаўскі мост» змянілі парадак рэгістрацыі ў чарзе, а мытнікі папярэдзілі пра скарачэнне пераліку тавараў, што можна везці ў Беларусь без пошліны.
«Зарэгістраваўся – і можна ехаць па сваіх справах», – гэтак пра новыя правілы зоны чакання ў Берасці пішуць падарожнікі, дзелячыся досведам у Telegram-чатах, прысвечаных мінанню мяжы.
У «Варшаўскім мосце» змянілі правілы рэгістрацыі ў электроннай чарзе. Раней было так: хаатычная чарга перад зонаю чакання з «улезунамі» і гандлярамі месцамі, пасля гэтых пакутаў аўтамабілісты даязджалі да сэрвіснай зоны, там рэгістраваліся і працягвалі марнаваць час, толькі ўжо ў зоне чакання. І ўжо адтуль, калі надыходзіла чарга, ехалі непасрэдна на пункт пропуску.
Цяпер можна адразу зарэгістравацца ў электроннай чарзе, але сядзець у зоне чакання неабавязкова. Ёсць магчымасць паехаць, напрыклад, у гатэль ці проста бавіць час у якой кавярні ў Берасці. Мясцовым жыхарам зайздросцяць: тыя дык наагул могуць чакаць удома.
Інфармацыя пра рух у чарзе абнаўляецца на сайце «Белмытсэрвісу» – гэта аператар зоны чакання. Калі статус аўтамабіля змяняецца на «Выкліканы ў пункт пропуску», кіроўца мае адну гадзіну, каб заехаць на дагляд. Калі не паспее, чаргу анулююць і давядзецца нанова рэгістравацца і чакаць.
За дадатковую плату пра набліжэнне чаргі паведамяць званком або SMS (паслуга каштуе адпаведна 5 і 3 рублі), за рэгістрацыю ў электроннай чарзе трэба заплаціць 12 рублёў.
Як пішуць у чатах, учора чарга да зоны чакання займала каля 3 гадзінаў. Сёння з раніцы чаргі зусім няма, можна адразу рэгістравацца. На месцы працуюць работнікі ДАІ і «Белмытсэрвісу», яны дапамагаюць зарыентавацца, куды ехаць і што рабіць.
Выглядае, што новая сістэма сапраўды дапаможа зэканоміць крыху часу, бо ў электроннай чарзе рэгіструюць нумар аўта (адпаведна, месца не прадасі) і нікога перад сабою не прапусціш.
Пры гэтым у чатах прапаноўваюць паглядзець у дынаміцы, як яно будзе працаваць, каб зрабіць высновы.
Што дакладна палепшылася, дык тое, што няма патрэбы нудзіцца ў зоне чакання і перад ёю:
«Лепей каву з булачкай есці ў цэнтры Берасця, чымся стрэсаваць у засцаным лесе».
«Калі ў чаргу перастануць улазіць, гэта ўжо будзе поспех і новаўвядзенне не дарэмнае. Куды спакайней будзе проста чаргу заняць і чакаць, а не бегаць уздоўж чаргі “ўлезуноў” лавіць».
«100 % крутая пастанова. Палова з тых, хто чаргу прадавалі, самыя ў Польшчу не ездзілі. Цяпер ім няма патрэбы там тусіць».
«Можна паехаць у горад, пасядзець у кавярні, нармальна паесці, адпачыць, а не парыцца ў машыне ўлетку і дубець узімку».
У чатах цяпер мараць, каб можна было зарэгістравацца ў электроннай чарзе, не прыязджаючы да зоны чакання, а дыстанцыйна, напрыклад, седзячы на канапе ў Менску.
Паводле звестак Дзяржаўнага памежнага камітэту на 16 гадзінаў, выезду ў Польшчу чакаюць 330 легкавікоў. Цяпер мяжу мінаюць тыя, хто зарэгістраваўся ў электроннай чарзе напярэдадні каля 23:00.
Агулам, як сведчаць у чатах, пераход мяжы займае амаль содні.
Аўтобусаў у чарзе – 30. Падарожнікі паведамляюць, што пакутаваць даводзіцца каля 15 гадзінаў. Аўтобус аднаго перавозніка, які меўся прыехаць з Менску ў Варшаву сёння а 5-й раніцы, яшчэ ў дарозе. А 10-й раніцы ў Варшаву з беларускай сталіцы прыбыў аўтобус, што паводле графіку мусіў прыехаць учора а 20-й.
У бок Беларусі ў чарзе каля 100 аўтаў. Раніцою было пуста, мяжу «праляталі» за паўтары-дзве гадзіны.
На двух пераходах на мяжы з Літвою чэргаў, паводле Памежнага камітэту, няма. Падарожнікі сведчаць, што і ў «Каменным Лозе», і ў «Беняконях» на ўсё пра ўсё патрабуецца ад 30 хвілінаў да 2 гадзінаў. Адзінае, што ў «Медніках» у бок Беларусі назбіралася 30 машынаў. Аўтобусы едуць без вялікіх затрыманняў.
Падобная сітуацыя ў «Грыгароўшчыне» на мяжы з Латвіяй: чэргаў няма ў абодва бакі, час на афармленне – мінімальны.
Тым часам Мытны камітэт папярэдзіў пра пашырэнне пераліку тавараў, што будуць абкладацца мытам пры ўвозе ў Беларусь. Вядзецца пра спіс тавараў не для асабістага карыстання.
З 6 кастрычніка без мыту перастануць пускаць каруселі, арэлі, манекены для краўцоў, бытавую тэхніку ў разабраным выглядзе, піратэхніку, мэблю і крэслы для салонаў прыгажосці, SPA-цэнтраў, цырульняў.
Акрамя таго, пашыраны пункт, што датычыць тытуню і нікацінавай прадукцыі. Цяпер там згадваюцца электронныя цыгарэты. У бязмытным парадку можна будзе завозіць да 200 сцікаў.
Сцяпан Кубік belsat.eu
