Амаль 16 млн чалавек маюць патрэбу ў гуманітарнай дапамозе.
З пачатку ўварвання расейскіх войскаў амаль 14 мільёнаў украінцаў вымушаныя былі пакінуць свае дамы. Тры мільёны дзяцей вымушана прыпынілі навучанне ў школах, 15,7 мільёна чалавек маюць патрэбу ў гуманітарнай дапамозе, іхная колькасць увесь час расце. Пра гэта гаворыцца ў паведамленні крызіснага каардынатара ААН ва Украіне і памочніка генеральнага сакратара ААН Аміна Аўада.
«Гэтае ўварванне ва Украіну ёсць парушэннем яе тэрытарыяльнай цэласнасці і Статуту Арганізацыі Абʼяднаных Нацыяў», – падкрэсліў Амін Аўад. Ён таксама заявіў, што вайна нанесла непапраўныя страты людзям і ахапіла практычна ўсе бакі жыцця, заклікаў неадкладна яе скончыць: «У гэтай вайне не было і не будзе пераможцы.
,,Семʼі і супольнасці былі разбураныя ды пазбаўленыя каранёў. Крыху больш як за тры месяцы амаль 14 мільёнаў украінцаў былі вымушаныя пакінуць свае дамы, большасць з іх – жанчыны і дзеці. Гэта маштабы і хуткасць перамяшчэння, нябачаныя ў гісторыі».
Паводле звестак Аміна Аўада, сотні тысяч людзей не маюць доступу да вады і электрычнасці, мільёны не ведаюць, адкуль ім узяць ежу на заўтра: «Праз 100 дзён вайна не слабее, асабліва на ўсходзе краіны». Ён папярэдзіў, што праз разбураную інфраструктуру з надыходам зімы жыцці мільёнаў мірных жыхароў могуць аказацца ў небяспецы.
Алена Рувіна belsat.eu
