Амбасадар Расеі ў Беларусі Барыс Грызлоў да афіцыйнага Дня яднання народаў дзвюх краінаў, што адзначаюць 2 красавіка, абвінаваціў беларускія дэмакратычныя сілы ў рэалізацыі «чарговай спробы паўзучай паланізацыі» Беларусі.
«Іхная галоўная зброя – мяккая сіла, заваблівыя публікацыі ў сацсетках, бяскрыўдныя на першы погляд вірусныя відэаролікі і старанна аформленыя пазнавальныя матэрыялы пра «слаўныя» біяграфіі псеўдагерояў, якія на справе ёсць здраднікамі і прыгнятальнікамі беларускай культуры, мовы і духоўнай спадчыны», – напісаў Барыс Грызлоў, звяртае ўвагу «Позірк».
Паводле яго, гэта частка «вялікай і старанна спланаванай інфармацыйна-псіхалагічнай спецаперацыі, закліканай закласці каштоўнасны і ідэалагічны падмурак для наступнага фармавання нацыяналістычнага руху, які ў выніку мае выліцца ў чарговы Еўрамайдан. Грызлоў заявіў, што супраць Масквы і Менску «заходнімі элітамі» вядзецца «гібрыдная агрэсія» супраць саюзу дзвюх краінаў.
Амбасадар не пагадзіўся з тым, што Расея – гэта варожы сусед, які «марыць» падпарадкаваць і захапіць Беларусь, а інтэграцыя – каланіяльны працэс, не сумяшчальны з захаваннем Беларуссю дзяржаўнага суверэнітэту. Адначасова адпрэчыў тэзіс, што «Беларусь – нібыта частка заходняй цывілізацыі».
Ціханоўская: Беларусь раствараецца ў Расеі
У сваю чаргу лідарка дэмакратычных сілаў Святлана Ціханоўская ў звароце адзначыла, што сэнс інтэграцыі Беларусі з Расеяй заключаецца ў тым, што «адзін дыктатарскі рэжым трымаецца за іншы як за адзіную апору сваёй улады і расплачваецца за гэты саюз незалежнасцю, свабодай і чалавечымі жыццямі».
,,«Пад маркаю «брацкага народу» прапаганда хлусіць пра бяспеку, стабільнасць і агульную культуру – пакуль за акном працягваюцца вайна, рэпрэсіі і поўнае падпарадкаванне нашай краіны інтарэсам Крамля. Рэжым Лукашэнкі настроіў супраць сябе кожнага суседа, акрамя аднаго – і больш не мае выбару, акрамя як ісці за ім ува ўсім. Кожны крок, які рэжым робіць насустрач Пуціну, штурхае Беларусь да растварэння ў Расеі», – заявіла яна.
Ціханоўская падкрэсліла, што беларусы не абіралі гэтага і ім не патрэбныя саюзы, праз якія «гінуць людзі і губляецца нашая нацыянальная самабытнасць». Замест гэтага яна заклікала перадаваць дзецям беларускія традыцыі і культуру, падтрымліваць беларускіх музыкаў, пісьменнікаў, мастакоў.
Нагадаем, што гэта далёка не першы раз, калі расейскі амбасадар умешваецца ва ўнутраныя справы Беларусі. Напрыклад, у 2023 годзе ён заявіў, што Беларусь і Расея ствараюць супольную камісію, якая, маўляў, будзе абараняць «гістарычную праўду» і спрыяць развіццю асветніцкай дзейнасці ў гістарычнай сферы. А ў 2024-м Грызлоў паабяцаў дапамагчы Менску здушыць пратэсты.
Якуб Хруст belsat.eu
