«Белсат» падводзіць вынікі апошніх содняў поўнамаштабнай вайны
«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 13 чэрвеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 32300 чалавек забітымі.
Цягам апошніх содняў на Данецкім і Луганскім напрамках асноўныя наступальныя дзеянні расейцаў праходзілі на Славянскім, Данецкім Бахмуцкім, Севераданецкім і Курахіўскім кірунках. Па-ранейшаму самая складаная сітуацыя цяпер у Севераданецку, дзе працягваюцца вулічныя баі. Паведамляецца, што расейцам удалося выбіць украінскія сілы з цэнтру гораду. Таксама войскі РФ спрабуюць атачыць Севераданецк і Лісічанск, заблакаваўшы лагістычныя шляхі ў гэтыя гарады.
На іншых участках лініі сутыкнення на Данбасе войскі РФ не вялі наступальных дзеянняў, але актыўна ўжывалі артылерыю і сістэмы залпавага агню.
За межамі Усходняй зоны аперацыі расейцы ў асноўным умацоўвалі свае пазіцыі ды праводзілі ратацыю сярод асабовага складу. Адзначаецца, што на Паўднёвабужскім і Харкаўскім напрамках расейцы трымалі абарону, каб не дапусціць прарыву ўкраінскіх сілаў.
Разам з тым камандуючы сіламі ЗША ў Еўропе генерал-лейтэнант Бэн Годжэс лічыць, што расейцы паступова страчваюць свой наступальны патэнцыял: жаўнеры знясіленыя, а войскі маюць праблемы з лагістыкай. Пры гэтым у расейцаў усё яшчэ застаецца перавага ў артылерыі. Вайсковец адзначыў, што кульмінацыя атак Расеі прыпадзе на жнівень, а ЗСУ пяройдуць да контрнаступлення ў верасні.
Дарадца кіраўніка Офісу прэзідэнта Украіны Міхайла Падаляк заявіў, што праграма мінімум для заканчэння вайны з РФ заключаецца ў тым, каб адвесці расейскія войскі да пазіцыяў, якія яны займалі 23 лютага. Пасля гэтага магчымы мірны перамоўны працэс. Задача максімум прадугледжвае тэрытарыяльную цэласнасць у міжнародна прызнаных межах Украіны, паразу Расеі і яе трансфармацыю.
Таксама Падаляк назваў неабходную колькасць зброі і тэхнікі для перамогі: 1000 гаўбіцаў, 300 рэактыўных сістэмаў залпавага агню, 500 танкаў, 2000 адзінак бранятэхнікі і 1000 дронаў.
Пры гэтым ваенны эксперт Алег Жданаў выказаў меркаванне, што ў апошнія дні рэзка ўзрасла верагоднасць уступлення ў вайну Беларусі. Эксперт звяртае ўвагу на тое, што з 18 чэрвеня па 8 ліпеня ў краіне пройдуць вучэнні з мабілізацыяй звычайных беларусаў, а таксама будзе закрытая паветраная прастора. У гэтых вучэннях Алег Жданаў бачыць рэалізацыю заявы Аляксандра Лукашэнкі пра павелічэнне арміі на 35 тысяч чалавек, якіх і могуць «кінуць у пекла вайны ў першую чаргу». Паводле Алега Жданава, Украіна гатовая так такога развіцця падзеяў.
У самой Беларусі намеснік міністра ўнутраных справаў Генадзь Казакевіч ацаніў колькасць суайчыннікаў, якія ваююць за Украіну. Паводле яго, гэта ўсяго 200 чалавек, сярод якіх у асноўным футбольныя ўльтрас і ўдзельнікі пратэставых акцыяў 2020-га. Нагадаем, Святлана Ціханоўская казала пра 1500 беларусаў, якія абараняюць Украіну.
Былы камандзір палка «Азоў» Максім Жорын паведаміў, што Украіна вярнула целы 220 загінулых абаронцаў Марыупалю. Сярод іх траціна – байцы палка «Азоў», а таксама прадстаўнікі іншых падраздзяленняў, якія абаранялі горад. Яшчэ прыкладна столькі ж целаў украінскіх салдатаў застаюцца ў Марыупалі, Украіна працуе над іх вяртаннем.
Тым часам ад расейскага ўварвання ва Украіну пацярпелі больш за 815 дзяцей. З іх 288 загінулі і яшчэ 527 былі параненыя. Але гэтыя лічбы не канчатковыя, бо ў некаторых раёнах працягваюцца актыўныя баявыя дзеянні.
Віцька Кавалак belsat.eu
