«Белсат» працягвае сачыць за рэпрэсіямі ў Беларусі. Прадстаўляем вам хроніку рэпрэсій за 2 чэрвеня 2025 года.
Facebook-старонка Лявона Вольскага прызнаная «экстрэмісцкай». Такое рашэнне вынес суд Ленінскага раёну Берасця 27 траўня. Вядома, што раней «экстрэмісцкімі» быў прызнаны Telegram-канал спевака і ягоная старонка ў Instagram.
Таксама ў Спіс экстрэмісцкіх матэрыялаў былі ўключаныя тэлеграм-каналы і чаты «Авангард (АКС)», «Бандерівська Киця», «Двіжчат», «ww2 confession»; старонкі ў Instagram «artistswithbelarus», «kastus.suprac», «peramen.hub», «cutpolitics»; сайт і сацсеткі праекту «belarus.indymеdiа»; старонкі ў Facebook «Василий Плешкунов», «Беларускi свет Bielaruski śvet», «Belarus.host24.spasе», «Будущая Беларусь: идеи, дискуссии, тенденции», «Belarusians in Chicago», «Sveriges Belarusier / Беларусы Швецыi», «Vitali.Sodzel», «Кронан», «Згуртаванне беларусаў Люксембурга», «Stories from Belarus», «Pavel Latushka», «Free Belarus!!! Жыве Беларусь!!! Вaltarusijа!!!», «Вольны Беларус».
Былому палітзняволенаму фігуранту «пінскай справы» Іллю Бохану ўдалося з'ехаць з Беларусі ў бяспечную краіну. Вядома, што Ілля ў 17-гадовым узросце браў удзел у паслявыбарчых пратэстах, за што пазней быў асуджаны да 3,5 гадоў зняволення. Вясной 2024-га ён цалкам адбыў тэрмін і выйшаў на волю. Хлопец паведамляе, што пасля вызвалення спрабаваў адаптавацца ў Беларусі і знайсці працу, але з гэтым узніклі сур’ёзныя цяжкасці: сілавікі не пакідалі яго ў спакоі, рэгулярна прыязджалі, правяралі тэлефон, пагражалі вяртаннем у турму. У выніку гэтай вясной хлопец вырашыў з’ехаць з краіны і ўжо 9 красавіка апынуўся ў Польшчы.
З 19 траўня перастала выходзіць на сувязь журналістка і каталіцкая верніца з Полацку Ціна Палынская. Паводле @christianvision, яе маглі затрымаць і арыштаваць у межах крымінальнай справы, аднак падрабязнасці пакуль невядомыя. Апошнім часам Ціна не займалася журналістыкай, а працавала з архівамі, выконваючы прыватныя замовы. У 2022 годзе яе ўжо судзілі за стужкі колераў украінскага сцяга і праводзілі ператрус.
Раман Шавель belsat.eu
