«Белсат» падводзіць вынікі апошніх содняў поўнамаштабнай вайны
«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі на вечар 28 чэрвеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 35 250 чалавек забітымі.
Цягам апошніх содняў ва ўсходняй зоне аперацыі расейцы не спынялі наступальных дзеянняў з мэтай усталяваць поўны кантроль над тэрыторыямі Данецкай і Луганскай вобласцяў.
На славянскім напрамку захопнікі наступалі ў бок паселішчаў Даўгенькае – Даліна, але атакі былі адбітыя ўкраінскімі абаронцамі. Таксама расейцы працягвалі ствараць умовы для наступу на лініі Ізюм – Славянск. На лісічанскім напрамку расейцы працягваюць штурмавыя дзеянні ў бок Ваўчаяраўкі – паўднёвых аколіцаў Лісічанскага НПЗ. Разам з тым праціўнік па-ранейшаму намагаецца ўзяць пад кантроль трасу Бахмут – Лісічанск, таксама войскі РФ правялі разведку боем у напрамку паселішчаў Мікалаеўка – Спірнае, але ЗСУ вымусілі ворага адступіць на старыя пазіцыі.
На бахмуцкім напрамку штурмавыя дзеянні акупантаў вядуцца ў бок Мыронаўкі – Вуглягорскай ТЭС. На іншых участках лініі сутыкнення на Данбасе расейцы ў асноўным абмяжоўваліся выведнымі дзеяннямі, а таксама нанясеннем авіяцыйных і артылерыйскіх удараў па ўкраінскіх пазіцыях.
За межамі Усходняй зоны аперацыі войскі РФ спрабавалі наступаць на харкаўскім напрамку – штурмавалі ўкраінскія тэрыторыі ў бок лініі Даўгалаўка – Залыман, але іхныя атакі былі адбітыя. Разам з тым на іншых участках лініі сутыкнення на Харкаўшчыне расейцы трымалі абарону, каб не дапусціць прарыву ЗСУ да дзяржаўнай мяжы.
На паўднёвабужскім напрамку акупанты не атакавалі і стараліся ўтрымаць ужо занятыя пазіцыі, каб не дапусціць контрнаступальных дзеянняў украінскіх сілаў у Харкаўскай і Мікалаеўскай вобласцях. На валынскім і палескім напрамках сітуацыя спакойная, але адзначаецца, што побач з украінскаю мяжой Узброеныя сілы Беларусі праводзяць планавае навучанне.
Разам з тым украінскі генерал Сяргей Крыванос заявіў, што ёсць дастаткова вялікая пагроза паўторнага выкарыстання тэрыторыі Беларусі для нападу на Украіну. Прычым гэта можа быць як напад расейскіх войскаў, так і ўключэнне ў гэтую агрэсію Узброеных сілаў Рэспублікі Беларусь. Пры гэтым Крыванос адзначыў, што расейскія ўлады «цяпер узмоцнена «апрацоўваюць» кіраўніцтва рэжыму ў Беларусі, а таксама «дастаткова жорстка кантралююць настроі ў беларускім войску».
На думку генерала, войскі Беларусі могуць пачаць наступ беспасярэдне на валынскім і ровенскім кірунках. Але дастаткова вялікая колькасць вайскоўцаў Беларусі не вельмі жадае браць удзелу ў гэтай агрэсіі.
Апошнія содні вайны ва Украіне не сталі выключэннем у плане атак Узброеных сілаў Расейскай Федэрацыі па мірных аб’ектах на тэрыторыі краіны. Пад вечар 27 чэрвеня расейскія войскі нанеслі ракетны ўдар па гандлёвым цэнтры «Амстор» у Краменчугу, што ў Палтаўскай вобласці Украіны. Загінулі не менш за 25 чалавек, 18 з якіх ужо апазнаныя, яшчэ дзясяткі чалавек пакуль лічацца зніклымі без вестак. Адзначаюць, што ў момант атакі ў гандлёвым цэнтры маглі быць да 1000 чалавек.
Лідары краінаў «Вялікай сямёркі» асудзілі атаку і нагадалі, што ўдары без разбору па мірным насельніцтве – гэта ваеннае злачынства, за якое будуць несці адказнасць Уладзімір Пуцін і астатнія датычныя. Украіне паабяцалі далейшую фінансавую, гуманітарную і вайсковую дапамогу «гэтак доўга, як будзе трэба».
Атаку назваў «абсалютна непрымальнаю» афіцыйны прадстаўнік Арганізацыі Аб’яднаных Нацыяў Стэфан Дзюжарык. У сувязі з атакай увечары 28 чэрвеня адбудзецца паседжанне Рады Бяспекі ААН.
Пры гэтым у Міністэрстве абароны Расеі толькі амаль праз содні прызналі, што нанеслі ракетны ўдар па Краменчугу. Паводле расейскай версіі, ударылі па ваенным аб’екце – ангарах з амерыканскім ды еўрапейскім узбраеннем і боепрыпасамі побач з гандлёвым цэнтрам. Расейскае Мінабароны сцвярджае, што ў выніку заняўся пажар, які перакінуўся на гандлёвы цэнтр. Пра ахвяраў сярод мірных жыхароў расейскі бок не паведаміў, але заявіў, што ў момант атакі гандлёвы цэнтр не функцыянаваў.
Ва ўкраінскім горадзе Хмяльніцкі ў межах дэрусіфікацыі пастанавілі пераназваць вуліцу і завулак Аляксандра Пушкіна ў гонар беларуса Аляксея Скоблі, які загінуў у баях за Украіну. Беларускі баец з пазыўным Тур гераічна загінуў у бітвах каля Бучы ды Ірпіня, ён коштам свайго жыцця дапамог уратаваць групу ўкраінскіх вайскоўцаў. Пазней рашэннем Уладзіміра Зяленскага Туру надалі званне Героя Украіны.
ВК belsat.eu
