Прынамсі 84 чалавекі трапілі пад пераслед.
23 студзеня ў Беларусі прайшла хваля ператрусаў і затрыманняў былых палітычных зняволеных і сваякоў палітвязняў. Сабралі ўсё што вядома пра гэтыя і іншыя рэпрэсіі на гэты час.
Прынамсі 84 чалавекі трапілі пад пераслед падчас сённяшняга масавага «хапуна». Частку з іх затрымалі, а ў некаторых проста правялі ператрус і адпусцілі. Сілавікі бяруць у людзей падпіскі аб неразгалошванні.
Сярод затрыманых – жонка зняволенага палітыка Міколы Статкевіча Марына Адамовіч, былы палітвязень Аляксей Раманаў і 76-гадовы актывіст Барыс Хамайда. Таксама сілавікі дзесяць гадзін ладзілі ператрус у маці сузаснавальніцы «Dissidentby» Марыны Касінеравай.
У пастановах супрацоўнікаў КДБ фігуруюць артыкулы за «фінансаванне экстрэмісцкай дзейнасці» і «ўдзел у экстрэмісцкіх фармаваннях». Некаторым супрацоўнікі КДБ казалі, што затрыманні і ператрусы нібыта звязаныя з праектам дапамогі палітвязням «INeedHelpBY», пра прызнанне якога «экстрэмісцкім фармаваннем» стала вядома 23 студзеня.
Адначасова працягвалася атака на сайт і сацсеткі фонду «BYSOL» і спроба яго дыскрэдытацыі.
Таксама стала вядома, што Следчы камітэт распачаў працэс спецыяльнай вытворчасці ў дачыненні Івана Краўцова – сакратара Каардынацыйнай рады. Яго вінавацяць паводле чатырох артыкулаў Крымінальнага кодэксу. А Генеральная пракуратура завяла справы паводле шасці артыкулаў Крымінальнага кодэксу супраць журналіста радыё «Свабода» Сяргея Дубаўца.
Апроч «INeedHelpBY», улады абвясцілі «экстрэмісцкімі фармаваннямі» «Беларускае Радыё Рацыя», праекты «КОТОС: мясцовае самакіраванне» і «Триэлит». У рашэнні КДБ пазначаныя таксама асобы, якіх звязваюць з гэтымі ініцыятывамі. Так, Піліп Гаўрышаў падпісаны як кіраўнік «INeedHelpBy». Асобамі, якія маюць дачыненне да «Радыё Рацыя» пазначаныя паляк Эўгеньюш Вапа і беларус Яўген Валошын. З праектам «КОТОС: мясцовае самакіраванне», паводле КДБ, звязаныя Вольга Цесакова і Дзмітрый Кухлей, а з Telegram-каналам «Триэлит» – Павел Аляксееў, Кірыл Шчамялёў, Яніна Андраюк, Аляксей Чарнак, Уладзімір Балабановіч, Вадзім Рушкевіч, Юрый Слабодчыкаў, Аляксандр Карцаў.
Таксама «экстрэмісцкімі матэрыяламі» прызнаны фільм расейскага блогера Іллі Варламава пра Беларусь «Беларусь: тирания Лукашенко, Чернобыль и союз с Россией | Страна КГБ и колхозов», які праглядзела амаль 3,5 мільёны чалавек. Апроч таго, Спіс экстрэмісцкіх матэрыялаў папоўнілі:
Таксама стала вядома, што сілавікі затрымалі кур’ера «Яндэкс.Ежы» Андрэя Міціна за пратэсты 2020 года.
Палітвязня, старшыню Партыі БНФ Рыгора Кастусёва перавялі ў гарадзенскую турму № 1. Ён знаходзіцца ў зняволенні з 12 красавіка 2021 года. За гэты час у палітыка выявілі анкалагічнае захворванне.
Менскі абласны суд 23 студзеня пакінуў без зменаў прысуд рэдактару «Рэгіянальнай газеты» Аляксандру Манцэвічу. 3 3 лістапада яму прызначылі чатыры гады калоніі.
А справу палітзняволенай старшыні абласнога грамадскага абʼяднання «ВелаГомель» Святланы Кароль перадалі ў пракуратуру. Яе затрымалі напрыканцы верасня, абвінаваціўшы ў паклёпе на Лукашэнку і ў распальванні сацыяльнай варожасці альбо варажнечы.
У Берасцейскі абласны суд 22 студзеня завяршыў разгляд крымінальнай справы 48-гадовага Дзяніса Красько, якога абвінавацілі ў распальванні сацыяльнай варожасці альбо варажнечы паводле ч. 1 арт. 130 Крымінальнага кодэксу. Прадстаўніца абвінавачання Марыя Бялт запатрабавала для яго пазбаўленне волі тэрмінам на тры гады калоніі ва ўмовах агульнага рэжыму.
Якуб Хруст belsat.eu
