У няволі ён знаходзіцца 628 дзён
3 чэрвеня спаўняецца 23 гады палітвязню Мікіце Літвіненку, які знаходзіцца за кратамі яшчэ з верасня 2020 года. Сваякі палітвязня просяць дасылаць яму лісты з віншаваннямі.
У няволі Мікіта Літвіненка знаходзіцца 628 дзён. Нягледзячы на сваё зняволенне, ён, распавядаюць сваякі, заўсёды вясёлы і бадзёры, усміхаецца і захоўвае аптымізм.
Сваякі просяць даслаць Мікіце лісты-віншаванні з нагоды дня народзінаў. І раяць лепш рабіць гэта заказнымі лістамі – «ён хаця б за яго распішацца і будзе ведаць, што вы напісалі».
Адрас для лістоў: ПК №17. 213004, г. Шклоў, вул. 1-я Заводская, 8, Літвіненку Мікіце Паўлавічу.
Студэнта БДЭУ Мікіту Літвіненку затрымаў ГУБАЗіК 13 верасня 2020 года. Яго жорстка затрымалі і збілі ў мікрааўтобусе. Спачатку хлопца арыштавалі на 15 содняў за ўдзел у акцыі пратэсту, а пасля заканчэння тэрміну арышту не выпусцілі і затрымалі ўжо ў якасці падазраванага ў крымінальнай справе пра нібы масавыя беспарадкі.
Паводле матэрыялаў справы, Мікіта Літвіненка разам з Янам Фалькіным, Уладзімірам Мацюхом і Уладзіславам Барысавым у тэлеграм-чаце «Гадзіна X» планаваў удзел у акцыях пратэсту, вызначаў маршрут, узгадняў дзеянні ў выпадку затрымання. Паводле следства, яны таксама рыхтавалі напад на міліцыянтаў.
Сваёй віны Мікіта не прызнаў. Хлопец заявіў, што ні ён, ні ягоныя прыяцелі не сумняваліся ў тым, што выбары былі сфальсіфікаваныя, і таму 9 жніўня 2020 года вырашылі пайсці да стэлы. Пры гэтым узялі з сабой бінты, каб падстрахавацца ад нападаў сілавікоў.
У той дзень яны некалькі разоў траплялі пад разгон святлошумавымі гранатамі і гумовымі кулямі. Мікіта растлумачыў, што бачыў толькі людзей у чорнай форме без апазнавальных знакаў, якія без папярэджанняў падбягалі, білі і затрымлівалі людзей. Мікіта распавёў, што транспарт у той вечар ужо не хадзіў, таму яны не маглі блакаваць яго. А на праезную частку ён і іншыя людзі сталі выбягаць толькі калі пачалася атака гранатамі. Дзеянні сілавікоў ён назваў незаконнымі.
Ніякіх намераў здзяйсняць пагромы, падпалы, паводле Літвіненкі, у іх не было. Больш за тое, ён, «як і дзясяткі тысяч мірных людзей, мірна выказваў пратэст».
«Не буду моцна разглагольстваваць. Я толькі хачу Вам сказаць. Усе разумеюць, што я маю на ўвазе пад словам Вам. Вы жывяце ў Беларусі і вам моцна пашанцавала, што вы будзеце адказваць за свае ўчынкі, здзейсненыя і тыя, што цяпер здзяйсняюцца, перад беларусамі. Чаму пашанцавала? Таму што мы народ не злапомны, мы народ, які ўмее дараваць, які заўсёды дасць, у выпадку чаго, другі шанец. Нам не патрэбныя будуць нейкія паказальныя »судзілішча«… Мы проста патрабуем, каб вы адказвалі перад законам па ўсёй яго строгасці. Таму маліцеся, проста маліцеся. Не важна каму. Любым выдуманым персанажам, любым вусатым іконам, каб усё было добра. І аднойчы… Аднойчы. Рана або позна. Хутчэй за ўсё рана. Я прыйду сюды, у гэтую залу і буду назіраць за вамі ў гэтай клетцы як за звярамі ў заапарку. Толькі я буду назіраць не як за дзікім зверам, якога немагчыма прыручыць і паддаць дрэсіроўцы, а як за звычайным папугайчыкам, які толькі і робіць, што паўтарае тое, што сказаў яго гаспадар. Таксама хачу дадаць, што ніякіх адмоўных эмоцый я да вас не адчуваю. Хутчэй наадварот. Нічога абсалютна адмоўнага да вас не маю. Нічога асабістага. І ў канцы хачу сказаць, што сваю віну я не прызнаю. Нічога супрацьзаконнага я не здзяйсняў. Мае дзеянні не прадугледжвалі і не прадугледжваюць ніякай грамадскай небяспекі. Таму яшчэ раз паўтаруся, што сваю віну я не прызнаю. Ніякіх памілаванняў я пісаць не буду. Ні перад кім я не буду прыніжацца. І, вядома, дзякуй Вам за ўвагу (звяртаецца да слухачоў). Я нават не ведаю, на каго паглядзець, у мяне разбягаюцца вочы. І вядома, вядома… Жыве Беларусь!» – заявіў Мікіта ў сваім апошнім слове ў судзе.
Суддзя Вікторыя Шабуня з падачы пракурора Арцёма Цвяткова прызнала Мікіту Літвіненку вінаватым паводле ч. 1 арт. 13 ч. 2 арт. 293 КК («Падрыхтоўка да ўдзелу ў масавых беспарадках»), ч. 1 арт. 342 КК («Арганізацыя або акіўны ўдзел у групавых дзеяннях, якія груба парушаюць грамадскі парадак»), ч. 1 арт. 14 ч. 1 арт. 342 КК («Падрыхтоўка да групавых дзеянняў, якія груба парушаюць грамадскі парадак»). Палітвязню прысудзілі чатыры гады калоніі ўзмоцненага рэжыму.
Фота вокладкі: Новы Час
Макар Мыш belsat.eu
