У сваім рашэнні суд спаслаўся на Жэнеўскую канвенцыю.
Суд у Бялай Падляскай спыніў крымінальную справу беларуса Віталя, які ў сакавіку 2021 года пераплыў памежную раку Буг, ратуючыся ад пераследу рэжыму Лукашэнкі.
Хаця мужчыну далі прытулак у Польшчы, яго абвінавацілі ў незаконным мінанні мяжы, перадае выданне Wyborcza.pl.
У сваім рашэнні суд спаслаўся на Жэнеўскую канвенцыю, якая забараняе пераслед уцекачоў за незаконнае мінанне мяжы. У выніку суддзя апраўдаў беларуса, а таксама спыніў справу супраць ягонай сяброўкі ды ейнага мужа, якія сустрэлі мужчыну каля мяжы.
Берасцейкі актывіст Віталь у сакавіку мінулага года нелегальна пераплыў памежную раку Буг праз палітычны пераслед на радзіме. У Польшчы мужчына атрымаў статус уцекача і жэнеўскі пашпарт. Пазней да яго ў Варшаву перабраліся жонка і сын. Але ў нейкі момант супраць актывіста распачалі крымінальную справу за незаконнае мінанне мяжы, абвінавачанне таксама выставілі дваім ягоным знаёмым.
Беларусу пагражала да 3 гадоў пазбаўлення волі, а ягоным сябрам – ад 6 месяцаў да 8 гадоў пазбаўлення волі.
Алена Рувіна belsat.eu
