Рэпрэсіі ў Беларусі не спыняюцца
Штодня сілавікі ў Беларусі затрымліваюць грамадзянаў краіны паводле палітычных матываў. Пры гэтым суды фактычна без доказнай базы прысуджаюць людзям шматгадовыя тэрміны турэмнага зняволення. «Белсат» на падставе інфармацыі ад праваабаронцаў сабраў асноўную інфармацыю за дзень 3 чэрвеня па затрыманых і асуджаных грамадзянах краіны.
Сілавікі затрымалі адваката Андрэя Мачалава. Юрыста распачнуць судзіць 6 чэрвеня паводле ч.1 арт. 380 КК («Падробка, выраб, выкарыстанне або збыт падробленых дакументаў»). Падставай жа для затрымання сталася тое, што адвакат прыйшоў на суд да падабароннай. Але на паседжанні выявілася, што Андрэя Мачалава пазбавілі ліцэнзіі. За гэта яго і будуць судзіць – за тое што прыйшоў, як высветлілася, па несапраўднаму адвакацкаму пасведчанню.
Суддзя суда Фрунзенскага раёна сталіцы Юлія Блізнюк прызнала вінаватай Ніну Майтак паводле ч. 1 арт. 368 КК – абраза Лукашэнкі. Падрабязнасці суда пакуль невядомыя.
У Гомлі асудзілі Аляксея Іванчыкава. Мужчыну абвінавацілі паводле арт. 364 КК («Гвалт або пагроза прымянення гвалту ў дачыненні да міліцыянта»). Іванчыкава затрымалі 27 лютага. На выхадзе з участка для галасавання Аляксея спрабавалі затрымаць сілавікі, ён пачаў уцякаць, а калі тыя яго схапілі, нібыта адарваў гузік на форме міліцыянта. За гэты адарваны гузік суд прысудзіў яму 2,5 года калоніі агульнага рэжыму.
Таксама ў Гомлі да 2,5 гадоў калоніі асудзілі 49-гадовага Сяргея Індзюкова. Яго абвінавацілі паводле ч. 3 арт. 203-1 («Незаконныя дзеянні ў дачыненні да інфармацыі аб прыватным жыцці і персанальных звестак»), арт. 369 («Абраза прадстаўніка ўлады»), ч. 1 арт. 368 («Абраза Лукашэнкі»).
Суддзя Яўген Шаршнёў таксама аштрафаваў Сяргея Індзюкова на 1920 рублёў.
У Менску затрымалі ўладальніка караоке-бара «Шум». 41-гадовы Аляксей быў адным з заснавальнікаў установы, якая працаваў на Кастрычніцкай.
У «пакаяльным» відэа сілавікі самі выкрылі, што арыштавалі мужчыну выпадкова – за публікацыю нейкай карыкатуры ў Фэйсбуку. Пасля гэтага яны нібыта выявілі, што ён быў падпісаны на план «Перамога».
Журналістку Ірыну Слаўнікаву перавялі ў Гомельскі СІЗА. Імаверна, у хуткім часе пачнецца «суд». Журналістку абвінавачваюць у стварэнні экстрэмісцкага фармавання і ўдзеле ў пратэстах. На якой падставе справу будуць разглядаць у Гомлі – невядома. Ірына Слаўнікава пражывала ў Менску, яна была затрыманая ў менскім аэрапорце і падчас следства знаходзілася ў менскім СІЗА №1.
Раней у Гомельскі абласны суд перадалі новую крымінальную справу супраць журналісткі Кацярыны Андрэевай.
Мікалай Каткоў belsat.eu
