Такім чынам кампаніі хочуць выйсці з-пад санкцыяў
Пасля поўнамаштабнага ўварвання на тэрыторыю Украіны шматлікія расейскія кампаніі і дзяржкарпарацыі трапілі пад амерыканскія і еўрапейскія санкцыі. Цяпер з’явілася інфармацыя, што прадстаўніцтвы расейскага бізнесу могуць пераехаць у Турэччыну, каб выйсці з-пад санкцыяў. Пра гэта піша выданне «Habertürk».
Расея і Турэччына ў апошнія тыдні абмяркоўвалі працэс перамяшчэння расейскіх падсанкцыйных кампаніяў з Еўропы ў турэцкую юрысдыкцыю. Паводле турэцкіх выданняў, у апошнія 48 дзён Расея і Турэччына актыўна абмяркоўвалі рэлакацыю расейскіх кампаніяў, якія трапілі пад санкцыі ЕЗ, з Еўропы ў Стамбул.
,,«Паводле атрыманай намі інфармацыі, 43 расейскія кампаніі і алігархі, у тым ліку «Газпром», перанясуць свае штаб-кватэры з Еўропы ў Стамбул. Гэты працэс, як чакаецца, пачнецца ў ліпені», – піша «Habertürk».
Акрамя таго, выданне адзначае, што напярэдадні візіту кіраўніка расейскага МЗС Сяргея Лаўрова ў Турэччыну туды прыбыла расейская дэлегацыя, якая абмеркавала папярэднія ўмовы пераносу офісаў расейскіх кампаніяў з Еўропы.
Раней з’яўляліся паведамленні, што некаторыя авіякампаніі з Расеі разглядаюць магчымасць перавесці свой бізнес у Турэччыну, каб пазбегчы санкцыяў, якія забараняюць ім лізінг, абслугоўванне і рамонт самалётаў.
Таксама нагадаем, што прэзідэнт Турэччыны Рэджэп Таіп Эрдаган выступіў супраць далучэння Швецыі і Фінляндыі да NATO, а таксама ініцыяваў перамовы пра транспартаванне ўкраінскай пшаніцы з заблакаваных партоў Чорнага мора.
Раман Лугоўскі belsat.eu
