«Белсат» працягвае сачыць за рэпрэсіямі ў Беларусі.
Берасцейца Ігара Неміровіча, які ўжо адбыў год зняволення за допіс у Instagram з «абразаю Лукашэнкі», паўторна затрымалі пасля вызвалення і асудзілі да трох гадоў калоніі ўзмоцненага рэжыму – гэтым разам за нібыта спрыянне экстрэмісцкай дзейнасці. Раней хлопец спрабаваў вярнуцца ў Беларусь праз камісію ў справе «пакаяння», але, не дачакаўшыся адказу, прыехаў сам і быў арыштаваны.
30 траўня ў Менску прайшоў закрыты судовы працэс над 78-гадовай актывісткаю Нінаю Багінскай, якую абвінавацілі ў неаднаразовым парушэнні Закону аб масавых акцыях. Падставаю сталіся шматлікія адміністратыўныя пратаколы за 2024 год. Суд прызнаў яе вінаватай, але не прызначыў пакарання, замест гэтага ўвёў прафілактычнае назіранне.
У Беларусі заблакавалі сайт выдання «Вечерний Бобруйск», у рэдакцыю якога наведваліся сілавікі (як высветліла «Наша Ніва», прыходзілі ў рэдакцыі яшчэ ў пачатку красавіка). Пры спробе зайсці на старонку карыстальнікі бачаць паведамленне пра блакаванне на пастанову Міністэрства інфармацыі. За межамі краіны сайт пакуль што даступны.
У так званы спіс экстрэмістаў, папаўняе які Міністэрства ўнутраных справаў, дадалі 28 прозвішчаў. Папаўненне Пераліку грамадзянаў Беларусі, замежных грамадзянаў або асобаў без грамадзянства, якія маюць дачыненне экстрэмісцкай дзейнасці, традыцыйна адбылося ў пятніцу, 30 траўня.
Раман Шавель belsat.eu
