«Internet Explorer» працаваў 26 гадоў
«Будучыня за Edge», піша «Microsoft». «Internet Explorer» працаваў 26 гадоў, але са з’яўленнем «Google Chrome» хутка страціў папулярнасць.
Ад 15 чэрвеня 2022 года карпарацыя «Microsoft» спыняе падтрыманне ўэб-браўзера «Internet Explorer» на «Windows 10». Працягнуць карыстанне названай версіяй праграмы для асобных найстарэйшых версіяў «Windows», для сервераў.
У першы час карыстальнікаў «Internet Explorer» на «Windows 10» будуць скіроўваць на «Microsoft Edge». Калі скіруюць дастатковую колькасць карыстальнікаў, праграму адключаць праз сістэму абнаўлення «Windows».
Але ўручную выдаляць IE не трэба: справа ў тым, што некаторыя старыя сайты найлепей працуюць з ім, але не з іншымі браўзерамі. У «Microsoft Edge» ёсць рэжым сумяшчальнасці з IE, але ён завязаны на файлах самога IE.
Самы першы ўэб-браўзер з’явіўся ў 1990 годзе і зваўся проста «WorldWideWeb». Яго стварыў сам «бацька Сусветнага павуціння» Тым Бёрнэрс-Лі. У 1993 годзе з’явіўся браўзер «Mosaic» з больш зручным інтэрфейсам, у 1994-м выйшаў «Netscape Navigator», які выцесніў «Mosaic», хоць і быў платным.
У 1995 годзе выйшла першая версія «Internet Explorer» на «Windows». Праграма, якая ішла ў камплекце з самай папулярнай аперацыйнай сістэмай, і хутка перацягнула звыш 90 % карыстальнікаў. «Netscape» не здаўся і заснаваў «Mozilla Foundation», якая распрацавала бяскаштоўны і адкрыты браўзер «Firefox», але той нават у найлепшыя для сябе часы меў толькі чвэрць рынку.
«Google Chrome», першую версію якога выдалі ў 2008 годзе, апярэдзіў IE ў 2012 годзе. У браўзераў склалася такая рэпутацыя: «Chrome» больш хуткі і больш сучасны за IE, а яшчэ ёсць «Firefox» для тых, хто хацеў больш «наваротаў».
Кампанія «Microsoft» спрабавала змагацца з кепскай рэпутацыяй IE, але канчаткова прайграла «браўзерныя войны», калі з’явілася шмат Android-смартфонаў з «Chrome» і без IE. У 2015 годзе «Microsoft» вырашыла не абнаўляць IE, а выдала новы браўзер «Edge». У 2019 годзе «Edge» перавялі на той самы рухавік, што і «Chrome».
На сёння 67 % карыстальнікаў выбіраюць «Chrome», 13,5 % – «Safari» ад «Apple» (папулярны менавіта на прадукцыі «Apple»), 5 % – «Edge». «Firefox» цяпер мае менш за 2 %. Браўзер «Opera», некалі папулярны ў Беларусі, Расеі і Украіне, цяпер мае крыху больш за 1 % карыстальнікаў, але яшчэ 2 % карыстаюцца мабільным «Opera Mini».
Алесь Наваборскі belsat.eu
